پاکستان پیپلزپارٹی کے چیئر مین بلاول بھٹو زرداری نے کہا ہے کہ گمبٹ میں فراہم کی جانے والی صحت کی سہولیات کراچی، لاہور، پشاور، کوئٹہ اور اسلام آباد کے اسپتالوں سے بھی بہتر ہیں۔
بلاول بھٹو زرداری نے یہ بات لاڑکانہ میں بینظیر بھٹو میڈیکل یونیورسٹی کے کانووکیشن کے دوران کہی، جہاں وہ فارغ التحصیل طلبہ میں اسناد بھی تقسیم کر رہے تھے۔
انہوں نے کہا کہ 18ویں ترمیم کے بعد پاکستان پیپلزپارٹی نے ملک میں صحت کے نظام کی بہتری پر خصوصی توجہ دی۔ ان کے بقول، گمبٹ میں قائم سہولیات کا معیار اتنا بلند ہے کہ صحت کے شعبے میں ہمارا مقابلہ صرف دنیا کے بہترین اداروں سے ہے، نہ کہ کسی صوبے سے۔
چیئر مین پیپلز پارٹی نے فارغ التحصیل طلبہ سے بھی مخاطب ہوتے ہوئے کہا کہ وہ اپنے اپنے صوبوں اور مختلف علاقوں میں بلا تفریق انسانیت کی خدمت کو اپنا شعار بنائیں اور صحت کے شعبے میں بہترین خدمات فراہم کریں۔