کراچی کے نادرن بائی پاس گلشنِ معمار کے علاقے میں پولیس اور شہریوں کو لوٹنے والے ڈاکوؤں کے درمیان دوطرفہ فائرنگ کا تبادلہ ہوا، جس کے نتیجے میں تین ڈاکو زخمی حالت میں گرفتار کر لیے گئے۔
ایس ایس پی ایس آئی یو محمد عمران خان کے مطابق پولیس نے بروقت اور مؤثر کارروائی کرتے ہوئے ملزمان کو قابو میں لیا۔ پولیس معمول کے گشت اور خفیہ اطلاعات پر مشکوک افراد کا تعاقب کر رہی تھی کہ اسی دوران ملزمان نے پولیس پارٹی پر فائرنگ شروع کر دی، جس پر پولیس نے جوابی کارروائی کی۔
گرفتار ملزمان کے قبضے سے تین پستول، نقد رقم اور شہریوں سے چھینے گئے موبائل فون بھی برآمد ہوئے۔ زخمی ڈاکوؤں کو فوری طور پر طبی امداد کے لیے ہسپتال منتقل کر دیا گیا۔
ایس ایس پی محمد عمران خان نے بتایا کہ ملزمان کی شناخت اور ان کے سابقہ مجرمانہ ریکارڈ کی جانچ جاری ہے، جبکہ ان کے خلاف مقدمات درج کر کے مزید قانونی کارروائی بھی کی جا رہی ہے۔