اسلام آباد: (نیوزڈیسک)وزیر داخلہ محسن نقوی اور وزیر مملکت برائے داخلہ طلال چوہدری سے مفتی منیب الرحمن کی سربراہی میں علما کا وفد نے اسلام آباد میں ملاقات کی۔وزیر داخلہ محسن نقوی نے قیام امن اور ملکی استحکام کے لیے مفتی منیب الرحمن اور دیگر علمائے کرام کی خدمات کو سراہا اور وفد کو مسائل حل کرنے کی یقین دہانی کرائی۔

ملاقات میں مسائل کے حل کا جائزہ لینے اور اقدامات اٹھانے پر اتفاق کیا گیا۔وزیر مملکت داخلہ طلال چوہدری کی سربراہی میں ایک کمیٹی تشکیل دی گئی جس میں مفتی منیب الرحمن اور دیگر علما بھی شامل ہوں گے۔

یہ کمیٹی مسائل کے حل کے لیے عملی سفارشات پیش کرے گی۔محسن نقوی نے کہا کہ مفتی منیب الرحمن ہمیشہ اتحاد، اتفاق اور یکجہتی کی بات کرتے ہیں اور سب کو متحد رکھنے کا کردار ادا کرتے ہیں۔وزیر داخلہ نے مزید کہا کہ ہم سب ایک ہیں اور پاکستان سب سے پہلے ہے۔طلال چوہدری نے علما کی پاکستان کے لیے خدمات کو قابل ستائش قرار دیا۔

مفتی منیب الرحمن نے ملک کی سالمیت، ترقی، استحکام اور خوشحالی کے لیے دعا کی۔وفد میں علامہ لیاقت حسین اظہری، مفتی عابد مبارک المدنی اور ملک محمد ابراہیم بھی شامل تھے۔