لاہور ہائیکورٹ نے وزیراعلیٰ پنجاب مریم نواز کی جانب سے چوہدری شوگر ملز کیس میں جمع کروائے گئے 7 کروڑ روپے کی واپسی کے معاملے پر نیب کو نوٹس جاری کرتے ہوئے جواب طلب کر لیا ہے۔
ذرائع کے مطابق مریم نواز نے عدالت سے درخواست کی تھی کہ چوہدری شوگر ملز کیس کو نیب نے بے بنیاد قرار دے کر ختم کر دیا ہے، لہٰذا کیس کے اختتام کے بعد بطور گارنٹی جمع کروائے گئے 7 کروڑ روپے واپس کیے جائیں۔
لاہور ہائیکورٹ کے 3 رکنی فل بینچ کی سربراہی چیف جسٹس عالیہ نیلم نے کی، جبکہ جسٹس جواد ظفر اور جسٹس عبہر گل خان بھی بینچ میں شامل تھے۔
نیب کے وکیل نے عدالت کو بتایا کہ کیس نیب کے ذریعے ختم کر دیا گیا ہے، تاہم چیف جسٹس نے استفسار کیا کہ کیا متعلقہ ٹرائل کورٹ کی بھی اس کی حتمی منظوری ہو گئی ہے۔ نیب کے وکیل نے جواب دیا کہ قانون کے مطابق اس کی ضرورت نہیں ہے، جس پر عدالت نے کہا کہ نیب نے تو کیس ختم کر دیا، لیکن ٹرائل کورٹ کی حتمی منظوری ضروری ہے۔
عدالت نے چوہدری شوگر ملز کیس کے حوالے سے نیب کو 4 فروری تک جواب جمع کرانے کا حکم دیا ہے اور معاملے پر مزید سماعت بعد میں ہوگی۔