وزیراعظم کی ہدایت پر اسلام آباد میں بین الاقوامی معیار کے نئے کنونشن سنٹر کی تعمیر کے لیے مجوزہ جگہ کا معائنہ کیا گیا۔
وفاقی وزیر داخلہ محسن نقوی نے مری روڈ بھارہ کہو بائی پاس کے قریب اس منصوبے کی جگہ کا دورہ کیا اور کہا کہ یہاں ہر قسم کے غیر قانونی قبضے کو ختم کیا جائے گا۔ انہوں نے واضح کیا کہ قابضین کے خلاف بلا امتیاز قانونی کارروائی کی جائے گی اور کسی کو بھی رعایت یا معاوضہ نہیں دیا جائے گا۔ تمام غیر قانونی تعمیرات کو فوری مسمار کیا جائے گا۔
محسن نقوی نے کہا کہ اسلام آباد میں بین الاقوامی معیار کی سہولیات فراہم کرنا حکومت کا عزم ہے، اور اس منصوبے کی تکمیل سے پاکستان میں ایس سی او سمٹ سمیت دیگر بین الاقوامی کانفرنسز کے انعقاد میں سہولت ہوگی۔
اس موقع پر چئیرمین سی ڈی اے محمد علی رندھاوا، ڈپٹی کمشنر اسلام آباد عرفان میمن اور دیگر اعلی حکام بھی موجود تھے۔