لاہور میں بھاٹی گیٹ کے قریب ماں اور بیٹی کے مین ہول میں گر کر ہلاک ہونے کے واقعے کے بعد صوبائی وزیر اطلاعات کے خلاف مقدمے کی درخواست لاہور ہائیکورٹ میں دائر کر دی گئی ہے۔
درخواست جوڈیشل ایکٹوزم پینل کے سربراہ اظہر صدیق ایڈووکیٹ کی جانب سے دائر کی گئی، جس میں پنجاب حکومت، لاہور ڈویلپمنٹ اتھارٹی (ایل ڈی اے) اور دیگر متعلقہ اداروں کو فریق بنایا گیا ہے۔
درخواست میں مؤقف اختیار کیا گیا ہے کہ انتہائی گنجان آباد علاقے میں مین ہول کھلا چھوڑ کر سنگین غفلت کا مظاہرہ کیا گیا، جس کے نتیجے میں ماں اور بیٹی اپنی جان سے ہاتھ دھو بیٹھیں۔ درخواست گزار نے کہا کہ حکومت نے اصل ذمہ داران کے خلاف کارروائی کے بجائے صرف نمائشی اقدامات کیے، جبکہ لاہور میں ہر سال ہزاروں مین ہول ڈھکن چوری ہونے کے باوجود مؤثر اقدامات نہیں کیے جاتے۔
درخواست میں یہ بھی کہا گیا ہے کہ پولیس کی جانب سے دفعہ 322 کے تحت مقدمہ درج کرنا ناکافی ہے کیونکہ یہ واقعہ محض حادثہ نہیں بلکہ مجرمانہ غفلت کا نتیجہ ہے۔ علاوہ ازیں، وقوعہ کے بعد متاثرہ فیملی کو پولیس اور حکومتی نمائندوں کی جانب سے ہراساں کیے جانے کا بھی ذکر کیا گیا ہے۔
درخواست گزار نے عدالت سے استدعا کی ہے کہ اصل حقائق سامنے لانے اور لواحقین کو معاوضہ دلانے کے لیے جوڈیشل کمیشن تشکیل دیا جائے، اور غفلت کے مرتکب افسران سے 25 کروڑ روپے کا معاوضہ وصول کر کے جاں بحق ہونے والی ماں بیٹی کے لواحقین کو دیا جائے۔ اس کے علاوہ درخواست میں وزیر اطلاعات پنجاب، ڈپٹی کمشنر لاہور اور دیگر ذمہ داران کے خلاف بھی مقدمہ درج کرنے کی ہدایت مانگی گئی ہے۔