حیدرآباد:(نیوزڈیسک) یوم یکجہتی کشمیر کے موقع پر حیدرآباد میں ریلی نکالی گئی جو ڈپٹی کمشنر سیکریٹریٹ سے نیاز سٹیڈیم تک گئی۔ ریلی کی سربراہی ڈپٹی کمشنر زین العابدین میمن نے کی اور شرکاء نے کشمیر کی آزادی تک جدوجہد جاری رکھنے کا عزم ظاہر کیا۔
ریلی میں ضلع کے تمام محکموں کے افسران، سکولوں کے طلبہ و طالبات، سماجی تنظیموں کے نمائندوں سمیت بڑی تعداد میں شہری شریک ہوئے۔ شرکاء نے کشمیری مسلمانوں پر جاری ظلم و بربریت کے خاتمے اور مسئلہ کشمیر کے اقوام متحدہ کی قراردادوں کے مطابق فوری حل کا مطالبہ کیا۔
ڈپٹی کمشنر زین العابدین میمن نے کہا کہ پاکستان مضبوطی سے کشمیری بھائیوں کے ساتھ کھڑا ہے۔ ریلی کے دوران شرکاء نے بھارت کے مظالم کے خلاف احتجاج کیا اور “کشمیر بنے گا پاکستان” کے نعرے لگائے۔ انہوں نے عالمی برادری سے کشمیری عوام پر ہونے والے مظالم کا نوٹس لینے کا بھی مطالبہ کیا۔
