سندھ اور پنجاب کے کچے کے علاقوں میں جاری آپریشن ’’نجات مہران‘‘ کے دوران قانون نافذ کرنے والے اداروں کو اہم کامیابی حاصل ہوئی ہے۔ پولیس کے مطابق سندھ کے بدنام زمانہ ڈاکو ثنا اللّٰہ شر عرف ثنو شر نے اپنے 13 ساتھیوں سمیت ہتھیار ڈال دیے ہیں۔
انسپکٹر جنرل سندھ پولیس جاوید عالم اوڈھو نے اس پیش رفت کی تصدیق کرتے ہوئے بتایا کہ ثنا اللّٰہ شر ایک عرصے سے کچے کے علاقوں میں سرگرم تھا اور اس کی گرفتاری قانون نافذ کرنے والے اداروں کے لیے ایک بڑا ہدف تھی۔ ان کے بقول سندھ حکومت نے اس کی گرفتاری پر ایک کروڑ روپے انعام بھی مقرر کر رکھا تھا۔
آئی جی سندھ کا کہنا تھا کہ ملزم سندھ اور پنجاب کے سرحدی کچے کے علاقوں میں اغوا برائے تاوان، قبائلی تنازعات اور دیگر سنگین جرائم میں ملوث رہا ہے۔ اس کے خلاف 100 سے زائد مقدمات درج تھے، جن میں پولیس اہلکاروں کی شہادت اور اغوا برائے تاوان جیسے سنگین الزامات شامل ہیں۔
پولیس حکام کا کہنا ہے کہ ثنا اللّٰہ شر کے ہتھیار ڈالنے کے بعد کچے کے علاقوں میں جرائم پیشہ نیٹ ورکس کے خلاف کارروائی مزید تیز کی جائے گی اور دیگر مطلوب ملزمان کے گرد گھیرا تنگ کیا جا رہا ہے۔ حکام کے مطابق اس پیش رفت سے علاقے میں اغوا برائے تاوان جیسے جرائم کے خاتمے میں نمایاں مدد ملنے کی توقع ہے۔