تامل فلم انڈسٹری سے وابستہ معروف اداکار جے (Actor J.) نے اپنے ایک انٹرویو میں تصدیق کی ہے کہ انہوں نے اسلام قبول کیا اور اس فیصلے کے پیچھے اپنی روحانی تسکین اور برابری کے احساس کو بنیادی وجہ قرار دیا ہے۔

میڈیا رپورٹس کے مطابق جے نے 2011 کے آس پاس اسلامی تعلیمات اور مذہبی طرزِ زندگی میں دلچسپی لینا شروع کی تھی، جبکہ 2019 میں ایک انٹرویو کے دوران انہوں نے باضابطہ طور پر اپنے قبولِ اسلام کی تصدیق کی۔

حال ہی میں دیے گئے ایک انٹرویو میں انہوں نے کہا کہ مسجد میں عبادت کے دوران انہیں مساوات، سکون اور عزت کا ایسا احساس ملا جو ان کے مطابق پہلے کبھی محسوس نہیں ہوا تھا۔ ان کا کہنا تھا کہ وہاں ہر شخص ایک ہی صف میں کھڑا ہوتا ہے اور کسی کو بھی خصوصی حیثیت حاصل نہیں ہوتی، جو ان کے لیے ایک گہرا روحانی تجربہ تھا۔

مزید پڑھیں؛مدینہ منورہ میں 44 ڈگری گرمی کی پیشگوئی، عازمین کو احتیاط کی ہدایت

جے کو اکثر اداکار وجے کے قریبی ساتھی اداکار کے طور پر بھی یاد کیا جاتا ہے، کیونکہ انہوں نے 2002 کی فلم *Bagavathi* میں وجے کے چھوٹے بھائی کا کردار ادا کیا تھا، جس سے انہیں فلمی دنیا میں پہچان ملی۔

انہوں نے یہ بھی بتایا کہ اگرچہ انہوں نے ابھی قانونی طور پر اپنا نام تبدیل نہیں کیا، تاہم مستقبل میں وہ “عزیز جے” نام اختیار کرنے پر غور کر رہے ہیں۔