عالمی منڈی میں خام تیل کی قیمتوں میں نمایاں کمی کے بعد پاکستان میں بھی پیٹرولیم مصنوعات کی قیمتوں میں بڑے ریلیف کا امکان پیدا ہوگیا ہے۔ ذرائع کے مطابق آئندہ ایک ہفتے کے جائزے میں پیٹرول کی قیمت میں 22 روپے فی لیٹر جبکہ ہائی اسپیڈ ڈیزل کی قیمت میں 42 روپے فی لیٹر تک کمی کی تجویز زیر غور ہے۔

ذرائع کا کہنا ہے کہ عالمی مارکیٹ میں خام تیل کی قیمتیں گزشتہ تین ماہ کی کم ترین سطح پر آ گئی ہیں، جس کے باعث پاکستان میں درآمدی لاگت کم ہونے کی توقع ہے۔ اگر مجوزہ کمی کی منظوری دی جاتی ہے تو اس سے نہ صرف عوام کو براہ راست ریلیف ملے گا بلکہ ٹرانسپورٹ کے شعبے میں بھی اخراجات کم ہوں گے۔

مزید پڑھیں:تیل پر عوامی ریلیف کی منتقلی میں پیٹرولیم لیوی بڑی رکاوٹ بن گئی

ماہرین کے مطابق ایندھن کی قیمتوں میں کمی کے نتیجے میں اشیائے ضروریہ کی ترسیل پر آنے والی لاگت میں بھی کمی آسکتی ہے، جس سے مہنگائی کے دباؤ میں کمی آنے کا امکان ہے۔ ان کا کہنا ہے کہ ایندھن سستا ہونے سے معیشت کے مختلف شعبوں پر بھی مثبت اثرات مرتب ہوں گے۔

دوسری جانب ذرائع نے بتایا ہے کہ حکومت ہائی اسپیڈ ڈیزل پر پٹرولیم لیوی میں 27 روپے فی لیٹر اضافے کی تجویز پر بھی غور کر رہی ہے۔ اگر اس تجویز کی منظوری دی گئی تو ڈیزل کی قیمت میں صارفین کو ملنے والا ممکنہ ریلیف جزوی طور پر کم ہو سکتا ہے۔

معاشی ماہرین کے مطابق عالمی سطح پر خام تیل کی قیمتوں میں حالیہ کمی رسد میں اضافے، خطے میں کشیدگی میں کمی اور مارکیٹ میں استحکام کے باعث سامنے آئی ہے، جس کے اثرات پاکستان سمیت تیل درآمد کرنے والے متعدد ممالک پر مرتب ہو رہے ہیں۔