خیبر پختونخوا کے وزیرِ اعلیٰ سہیل آفریدی (Sohail Afridi)نے کہا ہے کہ وفاقی حکومت کے ساتھ مذاکرات کے لیے پی ٹی آئی کی جانب سے پیش کیے گئے مطالبات میں سے کوئی بھی غیر آئینی یا غیر قانونی نہیں۔

خیبرپختونخوا کے وزیراعلیٰ سہیل آفریدی نے ایکس پرجاری بیان میں کہا کہ ہمیں دوسرے درجے کا شہری سمجھا جا رہا ہے اور ریاست ہمارے ساتھ سوتیلی ماں جیسا سلوک کر رہی ہے، یہ پی ٹی آئی کے مطالبات تھے، ہیں اور رہیں گے۔

انہوں نے ملک میں سیاسی استحکام، آئین و قانون کی بالادستی، جمہوری عمل کے تسلسل اور امن و امان کے قیام کے لیے وفاقی حکومت کے سامنے پیش کئے گئے مطالبات ایکس پر جاری کر دیئے۔

مزاکراتی کمیٹی کو میرا بھیجا گیا ڈرافٹ یہ ہے جسے میں اپنی قوم کے سامنے رکھ رہا ہوں۔ پوری قوم کو یہ علم ہونا چاہئیے کہ ان میں سے ایک ڈیمانڈ بھی غیر آئینی و قانونی نہیں ہے۔ ہمیں دوسرے درجے کا شہری سمجھا جا رہا ہے۔ ہمارے ساتھ ریاست ہر قابض لوگ سوتیلی ماں جیسا سلوک کر رہی ہے۔ یہ…

— Sohail Afridi (@SohailAfridiISF) October 4, 2026

پہلا مطالبہ ہے کہ وزیراعظم اور اپوزیشن رہنماؤں کی ملاقات: وزیرِ اعظم اور دونوں ایوانوں میں قائدینِ حزبِ اختلاف کے درمیان باقاعدہ ملاقاتیں ہوں، جن میں اہم سیاسی، قومی، آئینی اور قانونی معاملات پر بات ہو اور دو ماہ میں مؤثر پیش رفت یقینی بنائی جائے۔

دوسرا مطالبہ ہے کہ حکومت، پیپلز پارٹی اور اپوزیشن جماعتوں کے نمائندوں پر مشتمل کمیٹی بنائی جائے جو سیاسی معاملات اور اختلافات پر مسلسل مذاکرات کرے اور ایک ماہ میں قابلِ عمل حل کے لیے سفارشات پیش کرے۔

مزیدپڑھیں:وزیراعظم کی نواز شریف سے ملاقات، حکومت اور اپوزیشن کے درمیان مذاکرات پر بات چیت

تیسرا مطالبہ ہے کہ عمران خان اور بشریٰ بی بی کے حقوق: جیل قوانین اور آئین کے مطابق عمران خان اور بشریٰ بی بی کو تمام قانونی، انسانی اور طبی حقوق دیے جائیں اور جہاں قانون اجازت دے وہاں ان کے ذاتی یا نامزد ڈاکٹروں کی رائے کو بھی مدِنظر رکھا جائے۔

چوتھا مطالبہ ہے کہ عمران خان اور بشریٰ بی بی کو جیل قوانین کے مطابق اپنے اہلِ خانہ، نامزد وکلا اور مجاز رفقا سے ملاقات کی اجازت دی جائے، تاہم ان ملاقاتوں کو قانوناً ممنوع سیاسی مقاصد کے لیے استعمال نہ کیا جائے۔

پانچواں مطالبہ ہے کہ قیدیوں کی قانونی درخواستوں پر کارروائی: عمران خان، بشریٰ بی بی، خواتین، بزرگ اور بیمار قیدیوں کی سزاؤں کے خلاف درخواستوں سمیت دیگر قانونی درخواستوں پر قانون کے مطابق دس دن میں کارروائی شروع یا مکمل کی جائے، جبکہ سیاسی قیدی خواتین کو انسانی ہمدردی کی بنیاد پر جلد رہا کیا جائے۔

چھٹا مطالبہ ہے کہ خیبر پختونخوا میں دہشت گردی اور امن و امان: وفاقی اور صوبائی حکومتیں دہشت گردی کے خاتمے اور مستقل امن کے لیے مسلسل مشاورت کریں اور 72 گھنٹوں میں اجلاس کرکے ایک واضح اور قابلِ عمل حکمتِ عملی مرتب کریں۔

آخری بات یہ ہے کہ وفاقی حکومت کی جانب سے مطالبات اور طے شدہ اقدامات پر عمل درآمد کی تحریری یقین دہانی کے بعد پی ٹی آئی موجودہ لانگ مارچ منسوخ کرے گی، تاہم خلاف ورزی کی صورت میں پارٹی اپنے پُرامن اور قانونی احتجاج کا حق محفوظ رکھے گی۔

اس مسودے کا مقصد پہلے سے طے شدہ ڈرافٹس کو سبوتاژ کرنا تھا: محسن نقوی

وزیر داخلہ محسن نقوی نے وزیراعلیٰ سہیل آفریدی کی مطالباتی ایکس پوسٹ پر ردعمل میں کہا کہ رات گئے تقریباً نصف شب ایک مسودہ گردش میں لایا گیا، بظاہر اس مسودے کا مقصد پہلے سے طے شدہ ڈرافٹس کو سبوتاژ کرنا تھا۔

انہوں نے کہا کہ مذاکراتی ٹیموں نے ہمارے ساتھ ایک الگ مسودہ حتمی شکل دیا، دونوں فریق مذاکراتی ٹیموں کے حتمی مسودے پر متفق ہوئے۔

محسن نقوی نے کہا کہ کے پی میں دہشت گردی سے متعلق عملدرآمد پلان بھی طے کیا گیا، دونوں فریقوں کے اتفاق رائے سے الگ مسودہ اور دہشت گردی سے متعلق عملدرآمد پلان تیار کیا گیا۔