کراچی(نیوز ڈیسک )پاکستان میں سیاسی ہلچل مچی ہوئی ہے، متحدہ اپوزیشن عمران خان کو وزیراعظم کی کرسی سے ہٹانے کیلئے ہر ممکن کوشش کررہی ہے ۔
اسی دوران پاکستان کرکٹ ٹیم کے سابق کپتان شاہد آفریدی نے موجودہ ملکی صورتحال کو دیکھتے ہوئے ٹوئٹر پر ایک اپیل کی ہے۔
شاہد آفریدی نے ٹوئٹ کرتے ہوئے کہا کہ ‘پاکستان کے قیام کو74 سال ہوگئے ہیں ۔ خدارا کسی ایک منتخب حکومت کو تو آئینی مدت پوری کرنے دیں کیونکہ ہر عوام کی منتخب کردہ حکومت کو آئینی مدت پوری کرنے کا حق ہے ‘۔
انہوں نے کہا کہ 74 سال کی برائیاں ختم ہوتے ہوتے ہونگی۔
واضح رہے کہ پاکستان کے 74 سالہ سیاسی دور میں آج تک کوئی بھی وزیر اعظم اپنی 5 سالہ مدت مکمل نہیں کرسکا اور اب اپوزیشن کے نمبرز پورے ہونے کے بعد بظاہر لگ رہا ہے کہ عمران خان بھی اپنی مدت پوری نہیں کرسکیں گے۔
یاد رہے کہ گزشتہ روز متحدہ اپوزیشن کی پارلیمانی پارٹیوں کا اجلاس ہوا جس میں اپوزیشن نے دعویٰ کیاکہ 173 ارکان قومی اسمبلی موجود تھے جبکہ تحریک کی کامیابی کیلئے 172 ارکان کی حمایت درکار ہے۔
واضح رہے کہ عمران خان وزیراعظم کی کرسی پر مزید براجمان رہیں گے یا نہیں اس بات کا فیصلہ اتوار 3 اپریل کو عمد اعتماد پر ووٹنگ کے بعد ہوجائے گا۔
پاکستان کے قیام کو ۷۴ سال ہوگئے ہیں ۔ خدارا کسی ایک منتخب حکومت کو تو آئینی مدت پوری کرنے دیں کیونکہ ہر عوام کی منتخب کردہ حکومت کو آئینی مدت پوری کرنے کا حق ہے ۔ ۷۴ سال کی برائیاں ختم ہوتے ہوتے ہونگی
— Shahid Afridi (@SAfridiOfficial) March 31, 2022
