لاہور(نیوزڈیسک)پاکستان مسلم لیگ (ن) کے قائد محمد نوازشریف نے چار سال بعد وطن واپسی پر مینار پاکستان پر جلسہ عام سے خطاب میں ملک کو بحرانوں اور عوام کو مہنگائی، بے روزگاری اور غربت سے نجات دلانے کے لئے 9 نکاتی ایجنڈا جاری کردیا۔
تفصیلات کے مطابق ن لیگ نے سب سے پہلے سرکاری اور انتظامی اخراجات میں کمی کا اعلان کیا ۔
آمدنی،محصولات میں اضافہ، ٹیکس نظام میں بنیادی اصلاحات ایجنڈے کاحصہ ہیں ۔برآمدات میں اضافے کیلئے ہنگامی نوعیت کے اقدامات اٹھائے جائیں گے۔
انفارمیشن ٹیکنالوجی میں انقلاب ن لیگ کے ایجنڈے میں چوتھے نمبر پرہے۔بجلی اور گیس کی قیمتیں کم کرنا مسلم لیگ ن کے ایجنڈے میں شامل ہے۔
خسارے میں چلنے والے سرکاری اداروں کی انتظام کاری ن لیگ کے ایجنڈے میں چھٹے نمبر پرہے۔نوجوانوں اور خواتین کیلئے روزگار کے مواقع پیدا کرنا ایجنڈے کا حصہ ہے۔
زراعت میں جدید ٹیکنالوجی کے ذریعے انقلاب،نظام عدل وانصاف میں اصلاحات ایجنڈے میں شامل ہیں ۔