اسلام آباد(نیوزڈیسک) نگران وزیرداخلہ سرفراد بگٹی نے کہا ہے کہ تمام غیرقانونی افرادکی نشاندہی کرلی گئی ہے اور حتمی پلان مرتب کرلیا گیا ہے، غیرقانونی پاکستانی شناخت رکھنے والوں کو جیلوں میں بھیجا جائے گا۔
اسلام آباد میں پریس کانفرنس کرتے ہوئے نگران وزیرداخلہ سرفراز بگٹی کا کہنا تھا کہ غیرقانونی مقیم غیرملکیوں کیلئے حتمی پلان مرتب کر لیا گیا، اور ان کے انخلا کیلئےعارضی کیمپ قائم کر دیئے گئے ہیں، غیر قانونی افراد کو 50 ہزار روپے سے زائد رقم لے جانے کی اجازت نہیں دی جائےگی۔
سرفراز بگٹی کا کہنا تھا کہ غیر قانونی افراد کی معاونت کرنے والوں سے رعایت نہیں کی جائے گی، نادرا سے حاصل کردہ غیر قانونی شناختی کارڈ رکھنے والوں کیخلاف کارروائی ہوگی، اور غیرقانونی طور پر پاکستانی شناخت رکھنے والوں کوجیلوں میں بھیجا جائےگا،نادرا کے فیملی ٹری میں ہونے والوں کی بھی جلد نشاندہی کرلی جائے گی۔
سرفرازبگٹی نے بتایا کہ تمام غیر قانونی افراد کی نشاندہی کرلی گئی ہے، ریاست کے پاس غیرقانونی افرادکاڈیٹاموجود ہے، 31 اکتوبر کے بعد غیر قانونی مقیم افراد سے سمجھوتا نہیں کیا جائے گا، تاہم رضاکارانہ واپس جانے والوں کو سہولیات دی جائیں گی۔
نگران وزیرداخلہ نے کہا کہ عالمی سرمایہ کاروں کیلئے بزنس ویزا کی سہولت متعارف کرائی ہے، جو بھی پاکستان آئے گا وہ ویزا لے کر آئے گا۔