اسلام آباد ( ملک نجیب ) وفاقی دارالحکومت کی اہم تنصیبات اور اہم مقامات پر سکیورٹی خدشات کے پیش نظر دو دن کے لئے ڈرون اڑانے پر پابندی عائد کر دی گئی ہے ۔ رات گئے آئی جی اسلام آباد کی زیر صدارت اسلام آباد کی سیکیورٹی کے حوالے سے ہنگامی اجلاس منعقد ہوا ۔ ہائی سکیورٹی زون میں سکیورٹی کے سخت انتظامات کئے جا رہے ہیں ۔ ترجمان اسلام آباد پولیس کے مطابق آئی جی اسلام آباد کی زیر صدارت ہونے والے ہنگامی اجلاس میں تمام کیپٹل پولیس افسران نے شرکت کی ۔ اسلام آباد میں ڈرون اڑانے پر دو روز کے لئے پابندی عائد کردی گئی ہے۔ کسی بھی تقریب، جلسہ یا کسی تفریحی مقام، یا مارگلہ پہاڑیوں پر ڈرون اڑانے کی اجازت نہیں ہوگی۔ خلاف ورزی کرنے والوں کے خلاف قانونی کارروائی عمل میں لائی جائے گی جبکہ ہائی سکیورٹی زون میں سکیورٹی کے سخت انتظامات کئے جارہے ہیں۔ ترجمان کے مطابق شہریوں کو پڑتال کے دوران تاخیر کا سامنا کرنا پڑ سکتا ہے۔ شہری اضافی وقت کے ساتھ سفر کے لئے نکلیں۔ ذرائع کے مطابق مذکورہ اقدامات سکیورٹی خدشات کے باعث کئے گئے ہیں اور مارگلہ کی پہاڑیوں پر بھی سکیورٹی بڑھا دی گئی ہے ۔ آئندہ روز میں شہر کے داخلی و خارجی راستوں پر بھی سکیورٹی کے سخت انتظامات ہوں گے ۔