بانی: عبداللہ بٹ      ایڈیٹرانچیف : عاقل جمال بٹ

بانی: عبداللہ بٹ

ایڈیٹرانچیف : عاقل جمال بٹ

وزیراعظم کا برآمدات 2.7 ارب ڈالر تک پہنچنے پر اطمینان کا اظہار

اسلام آباد: وزیراعظم محمد شہباز شریف نے نئے مالی سال کے پہلے مہینے میں پاکستان کی برآمدات 2.7 ارب  ڈالرتک پہنچنے پر اطمینان کا اظہار کیا ہے۔ وزیراعظم نے کہا کہ جولائی 2025 سے جولائی 2026 کے دوران برآمدات میں 17 فیصد اضافہ خوش آئند اور ملکی معیشت کے لیے ایک مثبت اشارہ ہے۔ انہوں نے صرف ایک ماہ میں برآمدات میں 9 فیصد اضافے کو بھی نہایت تسلی بخش قرار دیا۔
وزیراعظم نے کہا کہ برآمدات پر مبنی ترقی حکومت کی اولین ترجیح ہے اور یہی وجہ ہے کہ معاشی اشاریے حکومت کی بہترین پالیسیوں کے باعث درست سمت میں گامزن ہیں۔ انہوں نے حکومت کی معاشی ٹیم کی کاوشوں کو سراہتے ہوئے انہیں “قابل تحسین” قرار دیا۔
وزیراعظم کا کہنا تھا کہ حکومت نہ صرف برآمدات میں اضافے بلکہ سرمایہ کاری کے فروغ اور کاروبار دوست ماحول کی فراہمی کے لیے بھی بھرپور کوششیں کر رہی ہے۔ انہوں نے بتایا کہ فیس لیس کسٹم اسیسمنٹ سسٹم کے نفاذ سے پورٹ آپریشنز میں نمایاں بہتری آ رہی ہے۔
مزید برآں، وزیراعظم نے جی ڈی پی کے مقابلے میں ٹیکس کلیکشن کے تناسب میں اضافے کو اطمینان بخش قرار دیا اور کہا کہ عالمی مالیاتی اداروں کی جانب سے پاکستان کی کریڈٹ ریٹنگ میں بہتری ملکی معیشت میں استحکام کی مظہر ہے۔
وزیراعظم نے بتایا کہ گزشتہ مالی سال میں ترسیلات زر کی مد میں پاکستان کو 34.9 ارب امریکی ڈالرز موصول ہوئے، جو کہ مالی سال 2023-24 کے مقابلے میں28.8 فیصد زائدہیں۔ ان کا کہنا تھا کہ بیرون ملک مقیم پاکستانیوں کے لیے مزید سہولیات فراہم کی جا رہی ہیں تاکہ وہ ملکی معیشت میں اپنا کردار بہتر طور پر ادا کر سکیں۔

وزیراعظم نے پاکستان اسٹاک ایکسچینج کی حالیہ کارکردگی کا بھی ذکر کیا اور کہا کہ 100 انڈیکس کا 145000 کی حد عبور کرنا ایک تاریخی سنگِ میل ہے، جو ملکی معیشت پر سرمایہ کاروں کے اعتماد کی عکاسی کرتا ہے۔
وزیراعظم نے کہا کہ حکومت کی توجہ ایک مضبوط، برآمدات پر مبنی اور پائیدار معیشت کی تشکیل پر مرکوز ہے، جس کے ثمرات جلد عام عوام تک بھی پہنچیں گے۔