فیفا ورلڈ کپ(FifaWorldCup) 2026 کے دوران ارجنٹینا کے ایک میچ میں پیش آنے والے جذباتی لمحے نے ہزاروں شائقین کو داد دینے پر مجبور کردیا، جب ایک بزرگ خاتون، جنہوں نے دعویٰ کیا کہ وہ اب تک ہونے والا ہر فیفا ورلڈ کپ دیکھ چکی ہیں، کو ارجنٹینا کی نمبر 10 جرسی بطور تحفہ پیش کی گئی۔

سوشل میڈیا پر وائرل ہونے والی ویڈیو کے مطابق سفید بالوں والی خاتون تماشائیوں میں بیٹھی تھیں اور ان کے ہاتھ میں ایک ہاتھ سے لکھا ہوا بینر تھا، جس پر درج تھا: ’میں ہر ورلڈ کپ دیکھ چکی ہوں۔‘ یہ مختصر سا پیغام دراصل کئی دہائیوں پر محیط ان کی فٹبال سے محبت اور وابستگی کی عکاسی کر رہا تھا۔

اسی دوران فیفا کا اہلکار ان تک پہنچا اور انہیں ارجنٹینا کی نمبر 10 جرسی پیش کی، جو قومی ٹیم کے کپتان لیونل میسی کی پہچان سمجھی جاتی ہے۔ جرسی وصول کرتے وقت بزرگ خاتون کی خوشی اور جذبات دیدنی تھے۔

梅西将他的球衣送给了一位100岁的老奶奶，她经历了所有的世界杯。那一刻真是太温馨了 🥹❤️ pic.twitter.com/Zs2T3bOkat

— 文明太空 (@wenmingtaikong) July 16, 2026

میچ کے دوران واٹر بریک کے موقع پر اسٹیڈیم کی بڑی اسکرین پر خاتون کو ان کے بینر اور جرسی کے ساتھ دکھایا گیا تو پورا اسٹیڈیم تالیوں، نعروں اور پرجوش نعروں سے گونج اٹھا۔ شائقین نے برسوں سے فٹبال سے وفاداری نبھانے والی اس مداح کو بھرپور خراجِ تحسین پیش کیا۔

مزید پڑھیں:ملک کی ترقی کا راز کس نظام میں ہے؟ اسد عمر نے فارمولا بتا دیا

یہ ویڈیو سوشل میڈیا پر تیزی سے وائرل ہو گئی اور دنیا بھر کے فٹبال شائقین نے اسے ورلڈ کپ کے یادگار ترین لمحات میں سے ایک قرار دیا۔ بہت سے صارفین نے لکھا کہ فٹبال صرف کھیل نہیں بلکہ نسلوں کو جوڑنے والا جذبہ ہے، اور یہ منظر اسی جذبے کی خوبصورت مثال تھا۔