قومی اسمبلی کے اسپیکر سردار ایاز صادق(Ayaz Sadiq) نے اقلیتوں کے قومی دن کے موقع پر اپنے پیغام میں ملکی تعمیر و ترقی میں اقلیتی برادری کی خدمات کو خراجِ تحسین پیش کرتے ہوئے کہا ہے کہ پاکستان کی اقلیتی برادری تعلیم، صحت، دفاع، تجارت اور زندگی کے دیگر تمام شعبوں میں قابلِ قدر خدمات انجام دے رہی ہے۔

سردار ایاز صادق نے کہا کہ اقلیتوں کا قومی دن ملک میں باہمی احترام، رواداری، مذہبی ہم آہنگی اور قومی یکجہتی کے عزم کی تجدید کا اہم موقع فراہم کرتا ہے۔ انہوں نے کہا کہ پاکستان کی ترقی اور خوشحالی میں غیر مسلم پاکستانی شہریوں کا کردار قابلِ فخر ہے اور ان کی خدمات ملکی تاریخ کا اہم حصہ ہیں۔

اسپیکر قومی اسمبلی نے کہا کہ آئینِ پاکستان تمام شہریوں کو بلاامتیاز رنگ، نسل اور جنس مساوی حقوق فراہم کرتا ہے اور ہر شہری کو مکمل مذہبی آزادی کی ضمانت دیتا ہے۔ ان کے مطابق مساوات، انصاف اور مذہبی آزادی ایک مضبوط، پرامن اور خوشحال پاکستان کی بنیادی بنیادیں ہیں۔

انہوں نے قائداعظم محمد علی جناحؒ کے 11 اگست 1947ء کے تاریخی خطاب کا حوالہ دیتے ہوئے کہا کہ بانیٔ پاکستان کا یہ خطاب مذہبی آزادی، مساوات اور تمام شہریوں کے یکساں حقوق کے عزم کی روشن مثال ہے۔ قائداعظمؒ کے وژن کے مطابق پاکستان میں ہر شہری کو اپنے مذہب اور عقیدے کے مطابق آزادانہ زندگی گزارنے کا مکمل حق حاصل ہے۔

مزیدپڑھیں:امریکا اور اسرائیل کے شام سے جوہری مواد ہٹانے کے لیے مذاکرات کامیاب

سردار ایاز صادق نے کہا کہ پاکستان کی پارلیمان اقلیتی برادری کے آئینی حقوق کے تحفظ اور مذہبی رواداری کے فروغ کے لیے مؤثر قانون سازی کررہی ہے۔ قومی اسمبلی میں موجود اقلیتی ارکان بھی قانون سازی اور پارلیمانی امور میں قابلِ ستائش کردار ادا کررہے ہیں اور ملکی جمہوری نظام کو مضبوط بنانے میں اپنا حصہ ڈال رہے ہیں۔

انہوں نے کہا کہ غیر مسلم پاکستانی شخصیات نے مختلف شعبوں میں ملک کی خدمت کرکے قومی تاریخ میں نمایاں مقام حاصل کیا ہے۔ ان شخصیات کی خدمات پاکستان کے لیے باعثِ فخر ہیں اور ان کے کردار کو قومی سطح پر تسلیم کیا جانا چاہیے۔

اسپیکر قومی اسمبلی نے اس عزم کا اظہار کیا کہ پارلیمان اقلیتوں کے آئینی حقوق کے تحفظ، مذہبی آزادی کے فروغ اور معاشرے میں باہمی احترام و برداشت کو مضبوط بنانے کے لیے اپنا کردار جاری رکھے گی۔ انہوں نے کہا کہ ایک ایسا پاکستان جہاں تمام شہری مساوی حقوق کے ساتھ زندگی گزار سکیں، ہی قائداعظمؒ کے وژن کی حقیقی تکمیل ہے۔