خلیج میں ایران کے خارگ جزیرے کے قریب دھماکوں کی آوازیں سنی گئیں جبکہ ایرانی میڈیا نے مقامی ذرائع کے حوالے سے ایک ایرانی ٹینکر کو امریکی فورسز کی جانب سے نشانہ بنائے جانے کی غیر مصدقہ اطلاعات بھی رپورٹ کی ہیں۔

نیم سرکاری خبر رساں ادارے فارس کے مطابق خلیج سے دھماکوں کی آوازیں سنائی دیں، تاہم دھماکوں کے بعد کسی قسم کے دھویں کے آثار نظر نہیں آئے۔

ریاست سے وابستہ ایرانی نیوز ایجنسی نورنیوز نے مقامی ذرائع کی جانب سے سامنے آنے والی غیر مصدقہ اطلاعات کا حوالہ دیتے ہوئے کہا کہ خارگ جزیرے کے قریب ایک ایرانی ٹینکر کو امریکی فورسز کی جانب سے داغے گئے میزائل سے نشانہ بنایا گیا۔

دوسری جانب ایرانی نیوز ویب سائٹ عصر ایران نے دعویٰ کیا کہ ٹینکر کو امریکی فورسز کی جانب سے داغے گئے 4 پروجیکٹائل سے نشانہ بنایا گیا۔ رپورٹ کے مطابق حملے کے وقت ٹینکر سے سامان اتارا جا رہا تھا۔

تاہم ان اطلاعات کے حوالے سے ایران یا امریکا کی جانب سے فوری طور پر کوئی باضابطہ اعلان سامنے نہیں آیا۔

مزید پڑھیں:ملک میں سونے کی قیمت میں بڑی کمی، فی تولہ 3600 روپے سستا

ایرانی میڈیا کی رپورٹس میں بھی ٹینکر کو نشانہ بنائے جانے کی اطلاعات کو غیر مصدقہ قرار دیا گیا ہے، جبکہ دھماکوں کی وجہ اور مقام کے بارے میں بھی کوئی حتمی سرکاری معلومات سامنے نہیں آئی۔