وزیر دفاع خواجہ آصف(Khawaja Asif) نے کہا ہے کہ اللہ کے فضل و کرم سے پاکستان نے اپنے سے 5 گنا بڑے دشمن کو شکست دے کر دنیا میں اپنی صلاحیت اور طاقت منوائی ہے۔

ان کے مطابق بھارت نے بھی اس کامیابی کو تسلیم کیا، جو پاکستان کے لیے بڑا اعزاز ہے۔ انہوں نے کہا کہ اس کامیابی کے بعد پاکستان کو عالمی سطح پر جو اہمیت اور نمایاں مقام حاصل ہوا، اس کے نتیجے میں ملک کی سفارتی کوششیں آج بھی جاری ہیں اور پاکستان نے اسلامی دنیا کو ایک نئی راہ دکھائی ہے۔

یونیورسٹی آف سینٹرل پنجاب کے سالانہ کانووکیشن سے خطاب کرتے ہوئے خواجہ آصف نے کہا کہ پاکستان کی مسلح افواج کئی برس سے دہشتگردی کے خلاف جنگ لڑ رہی ہیں اور اپنے خون کا نذرانہ پیش کرکے ملک کی آزادی اور سلامتی کا تحفظ کر رہی ہیں۔ انہوں نے کہا کہ پاکستان کی کامیابی صرف عسکری میدان تک محدود نہیں رہی بلکہ اس نے دنیا کو یہ احساس دلایا کہ ایک ملک اپنے سے کئی گنا بڑے دشمن کا مقابلہ کرکے کامیابی حاصل کرسکتا ہے۔

وفاقی وزیر دفاع خواجہ محمد آصف کا یونیورسٹی آف سینٹرل پنجاب کے سالانہ کانووکیشن سے خطاب https://t.co/ByuLMpIv2y

— PMLN (@pmln_org) October 31, 2026

وزیر دفاع نے کہا کہ پاکستان کی سفارتی کوششیں بھی جاری ہیں اور ملک نے اسلامی دنیا کو یہ پیغام دیا ہے کہ بیرونی طاقتوں کے فوجی اڈے لازماً متعلقہ ملکوں کے تحفظ کے لیے نہیں ہوتے بلکہ ان کے اپنے مفادات بھی ان سے وابستہ ہوتے ہیں۔ انہوں نے کہا کہ کسی ملک کی حفاظت کا اصل ذریعہ اس کی اپنی صلاحیت اور قوت ہوتی ہے۔

خواجہ آصف نے کہا کہ پاکستان نے 78 برس میں عالمی سفارتی سطح پر ایک اہم مقام حاصل کیا ہے، تاہم ملک کے نظام اور سیاسی حالات کی ذمہ داری سے سیاست دان خود کو بری الذمہ قرار نہیں دے سکتے۔ ان کے بقول گزشتہ کئی دہائیوں میں قومی سطح پر ہونے والی ناکامیوں میں ہم سب کا حصہ ہے اور وہ خود کو بھی اس نظام سے الگ یا بے قصور نہیں سمجھتے۔

مزیدپڑھیں:سہ ملکی سیریز فائنل: پاکستان کا سری لنکا کیخلاف ٹاس جیت کر فیلدنگ کا فیصلہ

انہوں نے کہا کہ پاکستان کی سیاسی تاریخ میں بعض اوقات پہلے کسی شخص کو گرفتار کیا جاتا ہے اور بعد میں اس کے خلاف الزامات تلاش کیے جاتے ہیں۔ اپنے سیاسی سفر کا ذکر کرتے ہوئے انہوں نے بتایا کہ وہ سابق صدر پرویز مشرف کے دور میں بھی قید رہے اور بعد ازاں 2020 میں نیب کی تحویل میں تقریباً ساڑھے چھ سے سات ماہ گزارے۔ ان کے بقول دونوں مرتبہ انہیں گرفتار کرنے والے ان کے خلاف الزامات واضح نہیں کرسکے۔

خواجہ آصف نے بتایا کہ انہوں نے تقریباً 21 برس بینکاری کے شعبے میں کام کیا اور 1991 میں عملی سیاست میں قدم رکھا۔ انہوں نے کہا کہ سیالکوٹ کے لوگوں نے انہیں 36 برس سے عزت اور اعتماد دیا ہے۔ وزیر دفاع نے طلبہ سے ملاقات کو اپنے لیے باعثِ مسرت قرار دیتے ہوئے کہا کہ نوجوانوں سے مل کر انہیں نئی توانائی ملتی ہے۔