گورنر پنجاب کی جانب سے نگراں وزیراعلیٰ کے نام کیلئے دیا گیا 72 گھنٹے کا وقت ختم ہوگیا، حکومت اور اپوزیشن کے درمیان کسی نام پر اتفاق نہ ہوسکا۔
پنجاب میں نگراں وزیراعلیٰ کی تعیناتی کا معاملہ پارلیمانی کمیٹی میں چلا گیا، گورنر پنجاب نےسپیکر کو پارلیمانی کمیٹی کے قیام کیلئے خط لکھ دیا۔

آئین کے آرٹیکل(1A)224 کے تحت وزیرِاعلیٰ پنجاب اور قائدِ حزبِ اِختلاف کا مقررہ مدت کے اندر نگران وزیراعلیٰ کی تقرری کے لئے نام پر اتفاق نہ ہوسکا، میری جانب سے اسپیکر کو مراسلہ جاری کر دیا گیا ہے کہ وہ آئین کے آرٹیکل224A(2)کے تحت نگران وزیرِاعلیٰ کے تقرر کے آئینی عمل کو آگےبڑھائیں۔ pic.twitter.com/wZBMkzdtcj

— M Baligh Ur Rehman (@MBalighurRehman) January 17, 2023

گورنر پنجاب کی جانب سے حکومت اور اپوزیشن کو نگراں وزیراعلیٰ کے متفقہ نام کیلئے 72 گھنٹے کا وقت دیا گیا تھا۔ پرویز الٰہی کی جانب سے تین نام جبکہ حمزہ شہباز کی طرف سے 2 نام سامنے آئے تاہم دونوں اطراف نے ایک دوسرے کے ناموں کو مسترد کردیا۔
نگراں وزیراعلیٰ پنجاب کیلئے کسی نام پر اتفاق نہ ہونے کے بعد معاملہ اسپیکر پنجاب اسمبلی کے پاس چلا گیا جو اب پارلیمانی کمیٹی تشکیل دیں گے۔
پارلیمانی کمیٹی میں حکومت اور اپوزیشن کی جانب سے برابری کے تناسب سے نمائندگی ہوگی۔
حکومت نے نگراں وزیراعلیٰ پنجاب کیلئے احمد نواز سکھیرا، نصیر خان اور ناصر کھوسہ کے نام تجویز کئے تھے جبکہ اپوزیشن نے احد چیمہ اور محسن نقوی کے نام دیئے تھے۔