اسلام آباد(ممتازنیوز) نگران وفاقی وزیر اطلاعات و نشریات مرتضیٰ سولنگی نے کہا ہے کہ اقلیتوں کے حقوق کا تحفظ ریاست کی جڑوں میں شامل ہے، پاکستان میں تمام شہریوں کو برابر حقوق حاصل ہیں، قائداعظم محمد علی جناح نے اقلیتوں کے حقوق کی بھرپور طریقے سے وضاحت کی۔ جمعرات کو انٹرنیشنل پیس فیسٹیول 2023ءسے خطاب کرتے ہوئے نگران وفاقی وزیر اطلاعات نے کہا کہ آج سے 22 سال قبل 2001ءمیں اقوام متحدہ نے عالمی یوم امن منانے کا اعلان کیا، 2023ءمیں عالمی انسانی حقوق کنونشن کے 75 سال بھی مکمل ہو رہے ہیں جو ایک اہم سنگ میل ہے۔ انہوں نے کہا کہ نیکٹا نے اپنے آغاز سے لے کر اب تک ملک کے اندر انتہاءپسندی اور دہشت گردی کے خاتمے کے لئے اہم اقدامات اٹھائے اور امن دشمن عوامل پر غور کیا۔ انہوں نے کہا کہ امن دشمن محرکات میں ایک اہم عنصر انتہاءپسندی ہے، پرتشدد انتہاءپسندی دہشت گردی کو جنم دیتی ہے۔ مرتضیٰ سولنگی نے کہا کہ اقلیتوں کے حقوق کا تحفظ پاکستان کی جڑوں میں شامل ہے۔ قائداعظم محمد علی جناح نے اپنی 11 اگست کی تقریر میں اقلیتوں کے حقوق کی بھرپور طریقے سے وضاحت کر دی تھی کہ تمام پاکستانی برابر ہیں اور مساوات کا فروغ انتہاءپسندی کے خلاف سب سے بڑا ہتھیار ہے۔ انہوں نے کہا کہ اسلام انسانیت سے حسن سلوک کا درس دیتا ہے جبکہ انتہاءپسندی کے خلاف جدوجہد ہماری اقدار میں شامل ہے۔ انہوں نے کہا کہ پاکستان کی طاقت ہمارا تنوع ہے اور امن دشمن عناصر ہماری اس طاقت کو کمزوری میں بدلنا چاہتے ہیں۔ نگران وفاقی وزیر اطلاعات نے کہا کہ ریاست سے وفاداری کا تقاضا ہے کہ کسی کے ساتھ امتیازی سلوک نہ رکھا جائے، ریاست کے تمام شہریوں کو برابر حقوق حاصل ہیں۔ ہمیں تعصبات کو ختم کرنا ہوگا، اسی جذبے سے پاکستان کی طاقت کھل کر سامنے آئے گی اور کوئی اس ملک کو کمزور نہیں کر سکے گا۔\932