لاہور(ممتاز نیوز)لاہور کے مقامی ہوٹل میں عوامی جمہوریہ چین کے قومی دن کی74 ویں سالگرہ کی تقریب کا انعقاد کیا گیا ،تقریب میں گورنر پنجاب بلیغ الرحمان ،نگران وزیر اعلی پنجاب محسن نقوی ،وفاقی وزیر فواد حسن فواد،صوبائی وزراء ایس ایم تنویر،اظفر علی ناصر، عامر میر، جمال ناصر،ابراہیم مراد،چیف سیکرٹری زاہد اختر زمان، امریکہ کی قونصل جنرل، ایران کے قونصل جنرل اور دیگر شخصیات نے شرکت کی ۔
گورنر پنجاب بلیغ الرحمان،وزیراعلیٰ محسن نقوی،صوبائی وزراء اور چیف سیکرٹری نے چین کے قائمقام قونصل جنرل چاؤ کی (Mr.Cao Ke)کے ساتھ ملکر کیک کاٹا۔
گورنر پنجاب بلیغ الرحمان اور وزیراعلیٰ محسن نقوی نے چین کے قومی دن پر قائمقام چینی قونصل جنرل کو مبارکباد دی
قائمقام چینی قونصل جنرل نے گورنر پنجاب اور وزیراعلیٰ کا شکریہ ادا کیا
وزیراعلیٰ پنجاب محسن نقوی کاحالیہ دورہ چین پاک چین تعلقات کے لئے ایک سنگ میل کی حیثیت رکھتا ہے۔ قائمقام چینی قونصل جنرل
پاک چین تعلقات کا نیادورشروع ہوچکا ہے، دونوں ممالک کے درمیان زندگی کے تمام شعبوں میں تعاون کی مزید نئی راہیں کھولے گا-
محسن نقوی نے کہا کہ دورہ چین کے دوران غیر معمولی پذیرائی ملی جس پرننشیا کے پارٹی سیکرٹری او رچینی قیادت کا شکرگزار ہوں، پاکستان اورچین ایک روشن اورپرامن مستقبل کیلئے شانہ بشانہ کھڑے ہیں ، چین ہمارا ہر موسم کا دوست،مضبوط شراکت دار اور قابل اعتماد پڑوسی ثابت ہوا ہے۔
نگران وزیراعلیٰ پنجاب نے کہا کہ حکومت پنجاب مختلف شعبوں میں چین کی حمایت اور تعاون پر شکرگزار ہے-
گورنر پنجاب بلیغ الرحمان نے کہا کہ محسن نقوی وزیراعلیٰ پنجاب اور ان کی کابینہ نے چین کا کامیاب دورہ کیا،اس دورے کے دوران تعاون بڑھانے کے حوالے سے حوصلہ افزاء او رمثبت بات چیت ہوئی،ساہیوال او ربہاولپور کو چینی شہروں کے ساتھ سسٹر سٹی قرار دینے کے معاہدے ہوئے۔ گورنر پنجاب نے کہا کہ پاکستان اور چین ہر موسم کے دوست ہیں،تقریب کے آغاز پر پاکستان اور چین کے قومی ترانے بجائے گئے۔