راولپنڈی(نیوزڈیسک)خیبرپختونخوا کے علاقے لکی مروت میں سیکیورٹی فورسز کا دہشتگردوں کے ساتھ فائرنگ کا تبادلہ ہوا ہے۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے ضلع لکی مروت کے علاقے سیمو وانڈا میں خفیہ اطلاع پر آپریشن کیا اور اس دوران فائرنگ کا تبادلہ ہو گیا جس کے نتیجے میں 4 دہشت گرد ہلاک ہو گئے جبکہ ایک کو زخمی حالت میں گرفتار کر لیا گیا۔
آئی ایس پی آر نے بتایا کہ مارے گئے دہشت گرد سیکیورٹی فورسز کے خلاف دہشت گردی کی متعدد کارروائیوں اور معصوم شہریوں کی ٹارگٹ کلنگ میں ملوث تھے۔
ترجمان آئی ایس پی آر کے مطابق دہشت گردوں کے قبضے سے اسلحہ اور گولہ بارود بھی برآمد کیا گیا ہے۔
آئی ایس پی آر نے بتایا ہے کہ مقامی لوگوں نے دہشت گردی کی لعنت کے خاتمے کے لیے پاک فوج کی کارروائی کو سراہا ہے اور بھرپور تعاون کا اظہار کیا ہے۔
لکی مروت میں سکیورٹی فورسز کا آپریشن، 4 دہشت گرد ہلاک
