لاہور: مسلم لیگ (ن) کے قائد نواز شریف نے اپنی رہائش گاہ جاتی امرا میں مصروف دن گزارا اور مختلف افراد سے ملاقاتیں کیں۔ سابق وزیر اعظم نے اپنی لیگل ٹیم سے بھی ملاقات کی، تاہم اے این پی کے رہنما غلام احمد بلور سے ملاقات نہ ہو سکی۔نجی ٹی وی کے مطابق نواز شریف کا کل لاہور سے مری روانہ ہونے کا امکان ہے، قائد ن لیگ کا چند روز مری میں قیام کا پروگرام ہے۔

مسلم لیگ ن کے قائد نواز شریف سے شہباز شریف، حمزہ شہباز اور اسحاق ڈار نے اپنی فیملیز کے ساتھ جاتی امرا میں ملاقات کی۔ قریبی رشتے داروں اور عزیز و اقارب بھی نواز شریف سے ملنے جاتی امرا پہنچے۔

پارٹی ذرائع کے مطابق شہباز شریف نے پارٹی قائد کو ملکی سیاسی صورتحال اور پارٹی امور کے بارے میں آگاہ کیا۔ دونوں رہنماؤں کے درمیان آئندہ کی انتخابی حکمت عملی پر بھی گفتگو ہوئی۔

سابق وزیر اعظم نواز شریف کو سابق وفاقی وزیر خزانہ اسحاق ڈار نے ملکی اقتصادی صورتحال کے بارے میں بریفنگ دی۔

سابق وزیر قانون اعظم نذیر تارڑ نے بھی نواز شریف سے ملاقات کی۔ اعظم نذیر تارڑ نے نواز شریف کو مختلف عدالتوں میں زیر سماعت مقدمات سمیت قانونی امور پر بریفنگ دی۔

اے این پی کے رہنما اور سابق وفاقی وزیر ریلوے غلام احمد بلور بھی نواز شریف سے ملاقات کرنے جاتی امرا پہنچے، تاہم انھیں نواز شریف سے ملنے کی اجازت نہ ملی جسکے بعد وہ واپس چلے گئے۔

غلام بلور نے میڈیا کو بتایا کہ وہ بغیر اطلاع کے نواز شریف سے ملنے آئے تھے، اور اجازت نہ ملنے کے بعد پشاور جا رہے ہیں۔

واضح رہے کہ نواز شریف حفاظتی ضمانت پر ہیں جس کی مدت 24 اکتوبر کو ختم ہو جائے گی۔ ذرائع کے مطابق نواز شریف اس سے پہلے عدالت کے سامنے سرنڈر کریں گے جس کے بعد انکے وکلا عدالت سے نواز شریف کی عبوری ضمانت کی درخواست کریں گے۔