اسلام آباد(نیوزڈیسک)وفاقی وزارت قومی صحت نے شہر کے دونوں بڑے اسپتالوں میں ایگزیکٹو ڈائریکٹر کے انتظامی عہدوں پر مستقل تعیناتی کیلئے وزارت دفاع کو خط لکھ دیا۔
تفصیلات کے مطابق خط کے مطابق وزارت دفاع پمز اور پولی کلینک ہسپتال کے انتظامی افسران کی تعیناتی کے لئے پاکستان آرمی میڈیکل کارپس کے افسران نامزد کرے کیونکہ محکمہ صحت نے اپنے زیر انتظام اداروں میں کام کرنیوالے افسران پر عدم اعتماد کا اظہار کیا ہے۔
وزارت قومی صحت نے پاکستان انسٹیٹیوٹ آف میڈیکل سائنسز(پمز) اور فیڈرل گورنمنٹ پولی کلینک اسپتال(ایف جی پی سی) میں سیکنڈ مینٹ بنیاد پر ایگزیکٹیو ڈائریکٹر کے عہدوں پر تعیناتی کیلئے وزارت دفاع کو خط لکھ کر قابل اور اہل افسران کی تعیناتی کیلئے مدد مانگ لی۔
وزارت دفاع کو لکھے گئے خط میں وزارت صحت حکام نے کہا ہے کہ اسلام آباد کے اسپتالوں پمز اور فیڈرل گورنمنٹ پولی کلینک میں گریڈ اکیس کے قابل اور اہل افسران کی ضرورت ہے جو کہ وزارت صحت میں میسر نہیں ہے وزرات دفاع دونوں انتظامی افسران کی تعیناتی کیلئے افسران نامزد کرے۔
اسلام آباد کے دونوں اسپتالوں میں وزارت قومی صحت کے تحت کام کرنیوالے تجربہ کار قابل اور ماہر افسران موجود ہیں لیکن ان افسران کی کارکردگی پر عدم اطمینان کا اظہار ہے۔ ترجمان وزارت صحت نے بتایا کہ ہم اسپتالوں میں اصلاحات لانا چاہتے ہیں اور وزارت دفاع کو یہ مراسلہ اسی بنیاد پر لکھا گیا ہے تاکہ وہ پاکستان آرمی میڈیکل کور سے بہترین افسران ان اسپتالوں کے لئے نامزد کرے۔
وزارت صحت کا ماننا ہے کہ پاکستان آرمی میڈیکل کور سے افسران آنے کے بعد اسپتالوں کے انتظامی امور احسن طریقے سے حل کر کے مریضوں کے مسائل کا سدباب کیا جاسکے۔