خیبرپختونخوا میں دہشت گردی کے 2 الگ الگ واقعات میں 2 فوجی جوان شہید ہو گئے جبکہ اس دوران ایک دہشت گرد ہلاک اور 2 کو گرفتار کر لیا گیا۔
پاک فوج کے شعبہ تعلقات عامہ (آئی ایس پی آر) نے بتایا کہ خیبر کے ضلع تیرہ کے علاقے میں خفیہ معلومات کی بنیاد پر آپریشن کیا گیا اور اس دوران فائرنگ کا تبادلہ ہو گیا جس کے نتیجے میں ایک دہشت گرد ہلاک جبکہ 2 کو گرفتار کر لیا گیا۔
آئی ایس پی آر کے مطابق دہشت گردوں کے قبضے سے اسلحہ اور گولہ بارود بھی برآمد کیا گیا ہے، یہ دہشت گرد سیکیورٹی فورسز کے خلاف دہشت گردی کی کارروائیوں اور علاقے میں معصوم شہریوں کی ٹارگٹ کلنگ میں ملوث تھے۔
آئی ایس پی آر کا کہنا ہے کہ ایک اور واقعے میں جنوبی وزیرستان کے ضلع سرویکئی کے عمومی علاقے میں دیسی ساختہ بم پھٹ گیا جس کے نتیجے میں 2 بہادر جوان شہید ہوگئے۔
شہید ہونے والوں کے نام سپاہی بنارس خان اور سپاہی عبدالکریم شامل ہیں۔
آئی ایس پی آر نے کہا ہے کہ سیکیورٹی فورسز دہشت گردی کی لعنت کو ختم کرنے کے لیے پُرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔