دبئی(سپورٹس ڈیسک)آئی سی سی ویمنز ٹی ٹوئنٹی ورلڈ کپ کا تاج اپنے سر کرنے والی نیوزی لینڈ ٹیم کی موجیں ہوگئیں ٹرافی حاصل کرنے کے بعد ٹیم کی کھلاڑیوں کو بڑا چیک بھی موصول ہوگیا۔

تفصیلات کے مطابق نیوزی لینڈ نے اتوار کی شب ٹی ٹوئنٹی ورلڈ کپ فائنل میں جنوبی افریقہ کو 32 رنز سے ہرا کر ٹائٹل اپنے نام کیا، یہ ویمنز یا مینز دونوں میں نیوزی لینڈ کا پہلا عالمی ٹائٹل ہے۔

کیوی ٹیم کی کھلاڑیوں کو ٹرافی کے ساتھ 2.34 ملین ڈالر کا چیک بھی ملا، ٹائٹل ہارنے والی جنوبی افریقی ٹیم کی تشفی بھی 1.17 ملین ڈالر سے کی گئی۔

اس بار آئی سی سی نے ویمنز ٹی 20 ورلڈکپ کی مجموعی انعامی رقم بھی تقریباً 8 ملین ڈالر مختص کی تھی، یہ گذشتہ ایڈیشن کے مقابلے میں 225 فیصد زائد ہے، پورے ٹورنامنٹ میں صرف ایک میچ جیتنے والی پاکستانی ٹیم بھی خالی ہاتھ نہیں رہے گی، آئی سی سی نے پانچویں سے آٹھویں نمبر تک رہنے والی ٹیموں کو بھی فی کس 2 لاکھ 70 ہزار ڈالر دینے کا اعلان کیا تھا، اگرچہ فائنل رینکنگ سامنے نہیں آئی مگر پاکستانی ٹیم رینکنگ میں آٹھویں نمبر پر رہے گی۔