اسلام آباد:وزیر منصوبہ بندی احسن اقبال نے کہا ہے کہ اب ہمارے پاس غلطی کی گنجائش نہیں اس لئے اب ملک میں صرف ایک لانگ مارچ ہونا چاہیے اور وہ اقتصادی لانگ مارچ ہے۔
نجی ٹی وی سے گفتگو کرتے ہوئے احسن اقبال نے کہاکہ ہم قومی سطح پر پیداواری صلاحیتوں پر کام شروع کر رہے ہیں اور ہمیں معیشت میں دولت پیدا کرنے کیلئے اقدامات کرنے کی ضرورت ہے۔
انہوں نے کہا کہ ہم نے کچھی کینال کو دوبارہ بحال کیا ہے جبکہ زرعی اداروں کو ری ویمپ کرنے کیلئے ایک ہزار ماہرین کو چین بھیجنے کا فیصلہ کیا اور سائنس اور لیبارٹری کے اداروں پر اربوں روپے لگائے ہیں۔
احسن اقبال نے کہا کہ مصنوعی ذہانت ( اے آئی ) ، مشین لرننگ اور دیگر سسٹمز پر بھی کام ہو رہا ہے ، ہم اس وقت ایک اسٹیبلائزیشن پروگرام میں ہیں ، ہر شعبے میں ہماری پرو ڈکٹیویٹی کم ہے ، ہم نےانٹرنیٹ کی رفتار تیز کرنی ہے۔
ان کاکہناتھا کہ حکومت فائبر آپٹک کیبل بڑھانے پر کام کر رہی ہے اور نوجوانوں کو بھی تربیت فراہم کی جائے گی ، لائیواسٹاک اور بریڈنگ پر توجہ دیں توغربت میں کمی ہوگی۔
انہوں نے کہا کہ ہمیں برآمدات بڑھانے کیلئے سہولیات دینا ہوں گی ، ہماری بڑی کمپنیاں یہاں زیادہ کما رہی ہیں ، انہیں باہر جانے کی کیا ضرورت ہے؟ ، ہمارا پاور سیکٹر زیادہ ڈیجیٹائز ہوچکا ہے ، ٹیچرز کی دوبارہ تربیت پر بھی کام کیا جا رہا ہے ، 2025 وژن کے تحت جو سسٹم قائم کیے اس سے اسٹارپ اپس شروع ہوچکا ہے۔
احسن اقبال نے کہا کہ دوسری جنگ عظیم کے بعد جن ممالک نے ترقی کی ان میں سیاسی استحکام شامل ہے ، وژن 2025 شروع کیا تو 2018 کے بھونچال نے اسے ختم کر دیا لیکن اب ہمارے پاس غلطی کی گنجائش نہیں اور اب ملک میں صرف ایک لانگ مارچ ہونا چاہیے جو اقتصادی لانگ مارچ ہے۔