اسلام آباد : جمعیت علمائے اسلام (ف) کے سربراہ مولانا فضل الرحمان نے کہا ہے کہ سیاسی جماعتوں کے درمیان مذاکرات جمہوری عمل کا انتہائی اہم جزو ہیں،افہام و تفہیم سے گریز اور مذاکرات سے انکار غیر جمہوری رویہ ہے۔ یہ بات انہوں نے حکومتی اتحادی مذاکراتی کمیٹی کے ترجمان اور مسلم لیگی رہنما سینیٹر عرفان صدیقی سے گفتگو کرتے ہوئے کہی جنہوں نے مولانا کی اقامت گاہ پر ان سے ملاقات کی اور علالت پر ان کی مزاج پرسی کی۔ مولانا فضل الرحمان نے کہا کہ بڑے بڑے مسائل مل بیٹھ کر آپس میں بات چیت کے ذریعے ہی طے کیا جا سکتے ہیں۔
مولانا فضل الرحمان نے کہا کہ پاکستان کو ہر اعتبار سے استحکام اور باہمی اتحاد کی ضرورت ہے جس کے لیے سیاسی ہم آہنگی ضروری ہے۔ سینیٹر عرفان صدیقی نے مولانا فضل الرحمان کو مذاکراتی عمل کی پیشرفت سے آگاہ کیا۔ انہوں نے دینی مدارس کی رجسٹریشن کے معاملے کو خوش اسلوبی سے سلجھانے کے لیے مولانا فضل الرحمان کی کوششوں کو سراہا۔