مصر میں غزہ امن کانفرنس کے موقع پر ترک صدر رجب طیب اردوان اور اٹلی کی وزیراعظم جارجیا میلونی کے درمیان ایک ہلکا پھلکا اور دلچسپ لمحہ عالمی توجہ کا مرکز بن گیا۔
بین الاقوامی امن سربراہی اجلاس کے دوران اردوان نے میلونی سے گرمجوشی سے مصافحہ کرتے ہوئے ان کی ظاہری شخصیت کی تعریف کی اور کہا،آپ بہت اچھی لگ رہی ہیں، میں نے آپ کو جہاز سے اترتے ہوئے دیکھا تھا۔ لیکن ایک بات کہنا چاہوں گا… آپ کو سگریٹ چھوڑ دینی چاہیے!
یہ سن کر قریب کھڑے فرانسیسی صدرایمانوئل میکرون قہقہہ لگا بیٹھے اور مزاحیہ انداز میں بولے:یہ ناممکن ہے!
میلونی نے بھی مسکراتے ہوئے فوراً جواب دیا: مجھے معلوم ہے… لیکن اگر میں نے سگریٹ چھوڑ دی تو شاید اتنی خوش مزاج نہ رہوں، اور میں کسی کو نقصان نہیں پہنچانا چاہتی!
ان کے اس ہنستے مسکراتے جواب پر موجود تمام رہنما ہنس پڑے، اور ماحول کچھ لمحوں کے لیے خوشگوار بن گیا۔
یاد رہے کہ یہ تینوں رہنما شرم الشیخ میں منعقدہ اس اہم اجلاس میں شریک تھے، جہاں دنیا بھر سے دو درجن سے زائد عالمی رہنماغزہ میں جاری انسانی بحران اور جنگ بندی کی کوششوں پر گفتگو کے لیے جمع ہوئے تھے۔
یہ لمحہ عالمی سیاست کی سنجیدگی میں ایک انسانی پہلو کا خوبصورت عکس تھا، جس نے ظاہر کیا کہ رہنما بھی کبھی کبھار مسکراہٹوں کے تبادلے سے تلخ حالات میں نرمی لا سکتے ہیں۔