کراچی – سابق وزیر خزانہ مفتاح اسماعیل نے خبردار کیا ہے کہ یہ لمحہ فکریہ ہے کہ دنیا میں پاکستان کی عزت بڑھنے کے باوجود ملک میں نئی سرمایہ کاری نہیں آرہی۔
جیو نیوز کے پروگرام ’آج شاہ زیب خانزادہ کے ساتھ‘ میں گفتگو کرتے ہوئے انہوں نے کہا کہ بے روزگاری کی شرح میں اضافہ متوقع ہے کیونکہ ملک میں معاشی نمو کی رفتار سست ہے۔
مفتاح اسماعیل نے کہا کہ ادارہ جاتی اصلاحات کے بغیر 6 فیصد معاشی نمو کے کوئی آثار نظر نہیں آتے۔ انہوں نے موجودہ ٹیکس سسٹم پر تنقید کرتے ہوئے کہا کہ ہم چھوٹے کمانے والوں سے ٹیکس لیتے ہیں، لیکن بڑے زمین دار یا صنعتی مالکان سے نہیں۔
سابق وزیر خزانہ نے مزید کہا کہ پاکستانی صنعت کو ایکسپورٹ کے قابل بنانے کے لیے صرف ٹیکس ریٹ کم کرنا کافی نہیں، بلکہ بجلی اور گیس کی قیمتیں بھی کم کرنی ہوں گی تاکہ کاروباری ماحول سازگار بنایا جا سکے۔