پاکستانی شوبز انڈسٹری کی سینئر اداکارہ نوشابہ بی بی نے حال ہی میں اپنی کم عمری میں شادی کے بارے میں کھل کر بات کی۔ اداکارہ نے بتایا کہ ان کی شادی صرف 12 سال کی عمر میں ہوئی اور وہ 14 سال کی عمر میں ماں بن گئی تھیں۔
نوشابہ بی بی، جنہیں جہان سلطانہ کے نام سے بھی جانا جاتا ہے، پرانے زمانے کے پشتون کرداروں میں خاصی مشہور رہی ہیں۔ انہوں نے پشتو ریڈیو اور پاکستان ٹیلی ویژن (پی ٹی وی) میں کئی دہائیوں تک اداکاری اور پروگرامنگ میں حصہ لیا۔ ان کا تعلق سوات سے ہے اور وہ ہمیشہ ٹی وی پر سر ڈھانپ کر نظر آتی رہی ہیں۔ مداح ان کی شائستگی اور خوش گفتاری کے معترف ہیں، اور خیبر پختونخوا میں ان کی خاصی فین فالوونگ موجود ہے۔
ایک حالیہ ڈیجیٹل میڈیا انٹرویو میں نوشابہ بی بی نے بتایا کہ بچپن میں ہی ان کی زندگی بدل گئی:مجھے ملازمت یا کیریئر کے لیے وقت ہی نہیں ملا کیونکہ میری شادی 12 سال کی عمر میں ہو گئی تھی، اور اسی دوران میں نے ٹیلی وژن پر کام بھی شروع کیا۔ میں گڑیوں سے کھیل رہی تھی کہ میری شادی کر دی گئی۔ ایک دن بتایا گیا کہ گھر میں شادی ہے، بس مجھے ایک لپ اسٹک دی گئی، اور سب کچھ بھول گئی کیونکہ لپ اسٹک میری کمزوری تھی۔”
انہوں نے مزید کہا، “میں خوشی خوشی سہیلیوں کے درمیان جا کر شادی کے بندھن میں بندھ گئی، اُس وقت بچوں کو یہ بھی معلوم نہیں ہوتا تھا کہ شادی کیا ہوتی ہے۔ جب تمام مہمان چلے گئے تو میں نے اپنی بھابھی سے کہا کہ مجھے واپس گھر بھیج دیں۔ شادی کے وقت میرے شوہر اور میرے درمیان عمر کا فرق 23 سال تھا، اور یہ شادی میری خالہ کے اصرار پر ہوئی۔”
نوشابہ بی بی نے بتایا کہ 14 سال کی عمر میں وہ ماں بن گئی اور ان کے تین بیٹے اور ایک بیٹی ہیں۔ انہوں نے والد کی سختی کے باوجود اپنے شوہر کے تعاون کو بھی سراہا، جو ان کے اداکاری کے کیریئر میں ہمیشہ ساتھ رہا۔
یہ انکشاف ان کے مداحوں کے لیے ایک حیران کن اور جذباتی کہانی کے طور پر سامنے آیا، جو ان کے کیریئر اور ذاتی زندگی کی جدوجہد کو اجاگر کرتا ہے۔