اداکارہ مونا سنگھ نے ویب سیریز ’کوہرا‘ کے دوسرے سیزن کی ریلیز سے قبل بالی ووڈ میں عمر اور صنفی امتیاز کے بارے میں اپنے خیالات کا اظہار کیا۔
44 سالہ مونا سنگھ نے کہا کہ انہوں نے کبھی اپنی عمر کو اسکرین پر رکاوٹ نہیں بنایا، کیونکہ وہ خود پر پُراعتماد ہیں اور بخوبی جانتی ہیں کہ وہ کون ہیں۔
ایک انٹرویو میں اداکارہ نے بتایا کہ انہیں اپنی قابلیت ثابت کرنے کی ضرورت محسوس نہیں ہوتی، اسی لیے وہ مختلف اور چیلنجنگ کردار ادا کرنے سے کبھی نہیں ہچکچاتی۔ انہوں نے کہا کہ لوگ اکثر پوچھتے ہیں کہ وہ عمر رسیدہ کردار کیوں کرتی ہیں، لیکن ان کے لیے کردار کی اہمیت سب سے زیادہ ہے، جو انہیں بطور اداکارہ جوش اور تسکین دیتا ہے۔
مونا سنگھ نے اعتراف کیا کہ بالی ووڈ میں خواتین کو عمر بڑھنے کے ساتھ معیاری اور اہم کردار کم ملتے ہیں۔ انہوں نے کہا کہ بدقسمتی سے یہاں خواتین کے لیے ایک ‘ایکسپائری ڈیٹ’ طے کر دی جاتی ہے، جبکہ مرد اداکار 60 سال کی عمر میں بھی رومانوی اور اہم کردار ادا کرتے ہیں۔
تاہم مونا سنگھ نے زور دیا کہ انہوں نے کبھی اس صنفی امتیاز کی سوچ کو خود پر حاوی نہیں ہونے دیا اور ہمیشہ اپنے فن اور کردار کی بنیاد پر کام کیا۔