بالی ووڈ کی ابھرتی ہوئی اداکارہ میدھا شنکر(Medha Shankar) نے اپنے کیریئر کے ابتدائی دنوں میں پیش آنے والے ایک “تذلیل آمیز” واقعے پر خاموشی توڑ دی، جس نے شوبز انڈسٹری کے پسِ پردہ رویوں پر نئی بحث چھیڑ دی ہے۔

فلم 12th Fail سے شہرت حاصل کرنے والی 28 سالہ اداکارہ نے اپنی آنے والی فلم Ginny Weds Sunny 2 کی ریلیز سے قبل ایک انٹرویو میں بتایا کہ انہیں انڈسٹری میں بعض مواقع پر غیر پیشہ ورانہ رویوں کا سامنا کرنا پڑا۔

انہوں نے میزبان سدھارتھ کنن کے ساتھ گفتگو کرتے ہوئے کہا کہ ایونٹس کے دوران ڈیزائنرز کی جانب سے بعض اوقات یہ سننے کو ملتا ہے کہ “یہ لباس آپ کو نہیں دیا جائے گا”، جو بظاہر چھوٹی بات لگتی ہے مگر اس کا اثر محسوس ہوتا ہے۔ ان کے مطابق یہ رویہ ذاتی نہیں ہوتا، لیکن ایسے لمحات انسان کو حیران اور غیر آرام دہ ضرور کر دیتے ہیں۔

میدھا شنکر نے کہا کہ وہ ان باتوں کو دل پر نہیں لیتیں، مگر انہیں یہ لمحات یاد رہتے ہیں، اور ایسے تجربات نے انہیں مزید مضبوط بنایا ہے۔

مزیدپڑھیں:دیپیکا پڈوکون اور اداکار رنویر سنگھ نے اپنے ہاں دوسرے بچے کی خوشخبری سنا دی

اس موقع پر ان کے ساتھی اداکار اویناش تیواری نے بھی ردعمل دیتے ہوئے کہا کہ ہر کسی کی اپنی ترجیحات ہوتی ہیں اور وہ ان کا احترام کرتے ہیں۔ تاہم انہوں نے اس بات پر زور دیا کہ فنکار اپنی محنت اور صلاحیت کے بل بوتے پر آگے بڑھتے ہیں، نہ کہ کسی کے احسان پر۔

اویناش تیواری نے مزید کہا کہ انڈسٹری میں موجود غیر ضروری دباؤ یا “گیمز” سے خوفزدہ ہونے کی ضرورت نہیں، کیونکہ اصل کامیابی ٹیلنٹ سے ہی حاصل ہوتی ہے۔

میڈھا شنکر اور اویناش تیواری اس وقت اپنی فلم Ginny Weds Sunny 2 کی پروموشن میں مصروف ہیں، جس کی ہدایت کاری پرشانت جھا نے دی ہے۔ فلم میں دیگر نمایاں فنکاروں میں للیٹ دوبے، سدھیر پانڈے، گووند نام دیو، گوپی بھلا، نایانی دکشت، وشواناتھ چٹرجی اور روہت چودھری شامل ہیں۔

فلم 24 اپریل کو سینما گھروں کی زینت بنے گی، اور شائقین کو اس رومانوی کامیڈی کا بے صبری سے انتظار ہے۔