پاکستان(Pakistan) نے ایران (Iran)سے بجلی کی درآمد میں اضافہ کرتے ہوئے اضافی 100 میگاواٹ بجلی لینے کی باضابطہ منظوری دے دی ہے، جس کے بعد بلوچستان کی ساحلی پٹی کے لیے مجموعی درآمدی بجلی 204 میگاواٹ تک پہنچ جائے گی۔

حکام کے مطابق یہ فیصلہ گوادر اور اس کے گرد و نواح کے علاقوں میں بجلی کی فراہمی کو بہتر اور مستحکم بنانے کی ہنگامی کوششوں کے تحت کیا گیا ہے، جہاں مقامی قومی گرڈ اس وقت صرف 40 سے 45 میگاواٹ تک مسلسل بجلی فراہم کرنے کی صلاحیت رکھتا ہے۔

13 مئی کو جاری کیے گئے فیصلے میں نیشنل الیکٹرک پاور ریگولیٹری اتھارٹی نے سینٹرل پاور پرچیزنگ ایجنسی گارنٹی لمیٹڈ اور ایران کے سرکاری توانائی ادارے توانیر کے درمیان بجلی کے معاہدے میں ترامیم اور نظرثانی شدہ ٹیرف کی منظوری دی۔

ریگولیٹری اتھارٹی نے اس سے قبل اقتصادی رابطہ کمیٹی کی منظوری کے بعد ایران سے بجلی درآمدی معاہدے میں کی جانے والی ترامیم نمبر 7، 8 اور 9 کو بھی باقاعدہ طور پر منظور کر لیا ہے۔

مزیدپڑھیں:شہباز حکومت کے 25 ماہ میں قرضوں میں 15 ہزار 714 ارب روپے اضافہ

ماہرین کے مطابق اس اقدام سے نہ صرف گوادر بلکہ پورے ساحلی علاقے میں بجلی کی صورتحال بہتر ہونے کی توقع ہے، تاہم طویل مدتی حل کے لیے مقامی پیداوار اور ترسیلی نظام میں مزید سرمایہ کاری کی ضرورت برقرار ہے۔