اسلام آباد(طارق سمیر)آزاد کشمیر میں نشستوں کے تنازع پر وفاق اور مقامی فریقین کے درمیان مذاکرات میں اہم پیشرفت سامنے آئی ہے، جہاں وفاقی حکومت نے مہاجرین کی 12 نشستیں مکمل ختم کرنے کے بجائے ان میں 3 نشستیں کم کرنے کی تجویز پیش کر دی ہے۔

ذرائع کے مطابق اسلام آباد میں ہونے والی ملاقات میں وفاقی وزیر رانا ثناء اللہ، طارق فضل چوہدری اور وزیراعظم آزاد کشمیر کے درمیان مختلف تجاویز پر غور کیا گیا۔

آزاد کشمیر کی ویلی نشستوں پر ووٹرز کی کم تعداد کے باعث عوامی ایکشن کمیٹی کے تحفظات برقرار ہیں۔ کمیٹی کا مؤقف ہے کہ کم ووٹ لینے والے امیدوار بھی بڑے مراعاتی نظام سے فائدہ اٹھاتے ہیں، جو موجودہ انتخابی ڈھانچے پر سوال اٹھاتا ہے۔

وفاقی ذرائع کے مطابق ویلی کی 6 نشستیں کم کر کے 3 کرنے کی تجویز بھی زیر غور ہے، تاہم حکومت نے 12 نشستیں مکمل طور پر ختم کرنے کی تجویز مسترد کر دی ہے۔

ذرائع کا کہنا ہے کہ فیصل ممتاز راٹھور آج عوامی ایکشن کمیٹی کی قیادت کو وفاقی تجویز سے آگاہ کریں گے۔
مذاکرات کا نیا دور 9 جون سے پہلے ہونے کا امکان ظاہر کیا جا رہا ہے، جبکہ فریقین کے درمیان اختلافات کے باوجود کسی درمیانی حل کی طرف پیش رفت جاری ہے۔

پاکستان کے زیر انتظام جاری یہ مذاکرات آئندہ دنوں میں سیاسی صورتحال پر اہم اثر ڈال سکتے ہیں۔