بولی ووڈ کے سپر اسٹار شاہ رخ خان (Shah Rukh Khan)کی سالگرہ ہر سال ان کے مداحوں کے لیے کسی تہوار سے کم نہیں ہوتی، جب ہزاروں کی تعداد میں لوگ اپنے پسندیدہ اداکار کی ایک جھلک دیکھنے کے لیے ان کی رہائش گاہ منت کے باہر یا ممبئی میں منعقد کی جانے والی خاص تقاریب میں جمع ہوتے ہیں۔ تاہم اس بار یہ روایت برقرار رہنا مشکل دکھائی دے رہا ہے۔
اداکار 2 نومبر کو اپنی 61ویں سالگرہ منائیں گے، تاہم اطلاعات کے مطابق وہ اس موقع پر ممبئی میں موجود نہیں ہوں گے اور مداحوں سے روایتی ملاقات بھی نہیں کر سکیں گے۔
شاہ رخ خان ان دنوں فلم ’کنگ‘ کی شوٹنگ میں مصروف ہیں۔ بھارتی میڈیا رپورٹس کے مطابق شاہ رخ خان اپنی نئی فلم ’کنگ‘ کی شوٹنگ کے سلسلے میں لندن میں ہوں گے، جہاں ان کی سالگرہ کے دن ایک گانے کی شوٹنگ طے کی گئی ہے۔
اس سے قبل وہ ممبئی میں بھی اداکارہ دپیکا پڈوکون کے ساتھ ایک گانے کی شوٹنگ مکمل کر چکے ہیں اور اب ٹیم کے ساتھ اگلے شیڈول کے لیے بیرون ملک روانہ ہو رہے ہیں۔
گزشتہ دو سالوں سے شاہ رخ خان اپنی رہائش گاہ منت پر مرمتی کام کی وجہ سے بالکونی سے مداحوں کا سامنا نہیں کر پا رہے تھے، بلکہ ان کی جگہ ممبئی کے ایک ہال میں خاص پرستاروں کے لیے ایک تقریب سجائی جاتی تھی جہاں وہ مداحوں سے گفتگو کرتے اور ان کے سوالات کے جوابات دیتے تھے۔ اس سال بیرون ملک شوٹنگ کی مصروفیات کی وجہ سے یہ سلسلہ بھی معطل رہے گا۔
مزیدپڑھیں: انسان سے دگنی مہارت، تشخیص کے لیے اے آئی ڈاکٹر آ گیا
گزشتہ دو سالوں سے شاہ رخ خان اپنی رہائش گاہ منت پر مرمتی کام کی وجہ سے بالکونی سے مداحوں کا سامنا نہیں کر پا رہے تھے، بلکہ ان کی جگہ ممبئی کے ایک ہال میں خاص پرستاروں کے لیے ایک تقریب سجائی جاتی تھی جہاں وہ مداحوں سے گفتگو کرتے اور ان کے سوالات کے جوابات دیتے تھے۔ اس سال بیرون ملک شوٹنگ کی مصروفیات کی وجہ سے یہ سلسلہ بھی معطل رہے گا۔
ان تقریبات میں شرکت کے لیے مداح پہلے سے پاس حاصل کرتے تھے اور بڑی تعداد میں مقام کے باہر جمع ہوتے تھے۔ ان ملاقاتوں کے دوران مداحوں کو شاہ رخ خان سے بات کرنے، سوالات پوچھنے اور ان کی گفتگو سننے کا موقع ملتا تھا، جبکہ میڈیا کو اندر آنے کی اجازت نہیں ہوتی تھی۔
رپورٹ کے مطابق منت میں تزئین و آرائش کے کام کے باعث شاہ رخ خان عارضی طور پر اپنی رہائش گاہ سے منتقل ہوئے تھے، جس کے بعد سالگرہ پر گھر کے باہر ان کی موجودگی کی روایت بھی متاثر ہوئی۔ اس بار فلم کی شوٹنگ انہیں ممبئی سے باہر لے جا سکتی ہے۔
یوں شاہ رخ خان کے مداحوں کو 2 نومبر کو ان کی سالگرہ پر بالمشافہ ملاقات کا انتظار چھوڑنا پڑ سکتا ہے، تاہم فلم ’کنگ‘ کی ریلیز سے قبل ممکنہ تقریب ان کے لیے امید کی ایک نئی وجہ بن سکتی ہے۔
رپورٹس کے مطابق فلم کنگ کی 24 دسمبر کو سینما گھروں میں ریلیز سے قبل شاہ رخ خان مداحوں کے لیے ایک خصوصی ملاقات کا اہتمام کر سکتے ہیں۔
سدھارتھ آنند کی ہدایت کاری میں بننے والی اس فلم میں شاہ رخ خان کے ساتھ ان کی بیٹی سہانہ خان، دپیکا پڈوکون، ابھیشیک بچن اور انیل کپور جیسے نامور فنکار اہم کرداروں میں نظر آئیں گے۔
