موبائل مینوفیکچرنگ کمپنی ایچ ایم ڈی(HMD) نے فلپائن میں نوکیا 2360 فلپ موبائل فون متعارف کرا دیا ہے۔ اس ماڈل کو بالخصوص بزرگ شہریوں اور سکول جانے والے بچوں کو مدنظر رکھتے ہوئے تیار کیا گیا ہے۔

نوکیا 2360 فلپ میں 2.8 انچ کی اندرونی ڈسپلے اسکرین اور 1.77 انچ کی بیرونی سکرین دی گئی ہے۔ فون میں 1450 ایم اے ایچ کی قابلِ تبدیل بیٹری، کیو وی جی اے کیمرا، 3.5 ملی میٹر ہیڈفون جیک، ایف ایم ریڈیو اور لاؤڈ سپیکر بھی موجود ہیں جبکہ اس کی اندرونی سٹوریج صرف 4 ایم بی ہے۔

اس موبائل فون کی نمایاں خصوصیات میں سے ایک فیملی اسسٹ ہے جس کے ذریعے خاندان کے نامزد افراد دور بیٹھ کر بھی فون کے کانٹیکٹس کا انتظام، آواز کی سطح میں تبدیلی اور روزانہ کی یاد دہانیاں سیٹ کر سکتے ہیں۔

مزیدپڑھیں:آسٹریلوی آل راؤنڈرگلین میکسویل کا انٹرنیشنل کرکٹ سے ریٹائرمنٹ کا اعلان

فون میں ایک مخصوص ایس او ایس بٹن بھی دیا گیا ہے جسے دبانے پر خودکار طور پر بنیادی ہنگامی رابطہ نمبر پر کال کی جاتی ہے جبکہ پہلے سے محفوظ کیے گئے پانچ نمبروں تک ہنگامی الرٹس بھی بھیجے جا سکتے ہیں۔

البتہ  یہ فون صرف ٹو جی نیٹ ورک کو سپورٹ کرتا ہے اور اس میں جدید فور جی یا فائیو جی کنیکٹیویٹی موجود نہیں۔

کلیم شیل ڈیزائن کے ساتھ پیش کیا جانے والا یہ فیچر فون ان صارفین کے لیے تیار کیا گیا ہے جو سمارٹ فونز کے بجائے سادہ اور آسان رابطے کو ترجیح دیتے ہیں جبکہ اس کی خاص توجہ بزرگ شہریوں اور سکول کے طلبہ پر مرکوز ہے۔