ہالی وڈ اداکارہ اور کاروباری شخصیت کماری جانسن 50 سال کی عمر میں انتقال کرگئیں۔ وہ ٹی وی سیریز ’بیورلی ہلز، 90210 اور فلم ڈیوڈ، وئیرز مائی کار؟‘ میں اداکاری کے حوالے سے جانی جاتی تھیں۔
اہلِ خانہ کے مطابق ان کی موت 4 نومبر کو ہوئی، جبکہ اس سے قبل انہیں دل کی شریان سے متعلق ایک سنگین طبی مسئلے کی تشخیص ہوئی تھی۔
کماری جانسن کو 27 اکتوبر کو لاس اینجلس میں واقع اپنے گھر پر طبی ایمرجنسی کے بعد سیڈرز سائنائی اسپتال منتقل کیا گیا تھا۔
ان کی بھانجی رونڈا اسکاٹ نے ٹی ایم زیڈ کو بتایا کہ دل سے متعلق طبی واقعے کے بعد اداکارہ اسپتال میں زیرِ علاج تھیں اور بدھ کی دوپہر پرسکون انداز میں دنیا سے رخصت ہوگئیں۔
رونڈا اسکاٹ نے پیپل سے گفتگو میں کہا کہ ان کی خالہ کی شخصیت روشن اور پُراثر تھی، اور خاندان ان کی زندگی اور یادوں کو ہمیشہ عزت کے ساتھ یاد رکھے گا۔
کماری جانسن کا اصل نام کم میری جانسن تھا۔ وہ امریکی ریاست پنسلوانیا کے شہر پٹسبرگ میں پیدا ہوئیں اور ولکنزبرگ میں پرورش پائی۔ انہوں نے کیلیفورنیا یونیورسٹی آف پنسلوانیا سے ابتدائی تعلیم اور بچوں کی نفسیات کے شعبوں میں تعلیم حاصل کی۔
جس کے بعد نیویارک منتقل ہوگئیں۔ تعلیم مکمل کرنے کے بعد انہوں نے بین الاقوامی پروازوں میں فضائی میزبان کے طور پر کام کیا اور اسی دوران ماڈلنگ کے لیے منتخب ہوئیں۔
جانسن نے حسن کے مقابلوں میں بھی حصہ لیا۔ 1993 میں وہ مس پنسلوانیا یو ایس اے منتخب ہوئیں اور مس یو ایس اے کے فائنل مرحلے تک پہنچیں۔ اسی سال انہوں نے ٹیلی ویژن سیریز بیورلی ہلز، 90210 کی ایک قسط سے اداکاری کا آغاز کیا۔
بعد ازاں وہ V.I.P. سمیت مختلف ٹی وی پروگراموں اور فلموں میں نظر آئیں۔ ان کی فلموں میں ڈیوڈ، وئیرز مائی کار؟، لیگیسی اور دی سمر آف میسیکر شامل ہیں، جبکہ ان کے دیگر کاموں میں آزاد فلمیں بریک اے لیگ، گینگ وارز، اسپینش فلائی اور شیڈو فیوری بھی شامل تھیں۔ ان کا آخری اداکاری کا کام 2017 میں ٹکرز وار کی ایک قسط تھی۔
2003 میں بیٹے کی پیدائش کے بعد جانسن نے کچھ عرصے کے لیے اداکاری سے وقفہ لیا۔ بعد میں وہ دوبارہ فنونِ اداکاری سے وابستہ ہوئیں اور 2007 سے 2010 کے درمیان کئی اسٹیج ڈراموں میں مرکزی کردار ادا کیے، جن میں اے کرسمس کیرول کی پیشکش بھی شامل تھی۔
مزید پڑھیں:آئی سی سی کی نئی پلیئر رینکنگ، فخر، شاہین اور منہاس سمیت پاکستانی کھلاڑیوں کی ترقی
2011 میں انہوں نے جلد کی نگہداشت کی کمپنی ’اسکن گلو بائی کماری‘ قائم کی، جسے وہ اپنی وفات تک چلاتی رہیں۔ رواں سال وہ لاس اینجلس میں فلم مائیکل کے پریمیئر کے موقع پر بھی دیکھی گئی تھیں، جو ان کی آخری عوامی تقریبات میں سے ایک تھی۔
