وزیرآباد(ممتاز نیوز )وزیر آباد حملے میں ملوث گرفتار ملزم کے حوالے سے ڈی پی او گجرات نے انکشاف کیا ہے کہ ملزم کی دوسری ویڈیو کہاں ریکارڈ ہوئی مقام کا کچھ معلوم نہیں۔تفصیلات کے مطابق ڈی پی او گجرات سید غضنفر علی شاہ کی جانب سے میڈیا سے گفتگو کرتے ہوئے عمران خان پر حملہ کرنے والے ملزم کی لیک ہونے والی ویڈیوز سے متعلق اہم انکشاف کیا گیا۔انہوں نے بتایا کہ ملزم کی پہلی ویڈیو بھی ہماری کسٹڈی سے لیک نہیں ہوئی ، تحقیقات کی جا رہی ہیں کہ ویڈیو کیسے لیک ہوئی۔ جبکہ ملزم کی دوسری ویڈیو کے بارے میں ڈی پی او گجرات نے بتایا کہ انہیں نہیں معلوم کہ یہ ویڈیو کس مقام پر ریکارڈ کی گئی، ویڈیو میں جو کمرہ دکھائی دے رہا ہے، وہ کمرہ کبھی نہیں دیکھاواضح رہے کہ جمعہ کے روز چیئرمین تحریک انصاف عمران خان پر قاتلانہ حملے میں ملوث ملزم نوید کو لاہور منتقل کر دیا گیا۔میڈیا رپورٹس میں ذرائع کا حوالہ دیتے ہوئے بتایا گیا ہے کہ ملزم کو چوہنگ میں قائم سی ٹی ڈی سیل میں پہنچا دیا گیا۔سی ٹی ڈی سمیت دیگر اداروں نے ملزم سے پوچھ گچھ کی ، ملزم نوید کے بیان کے بعد پولی گرافک ٹیسٹ بھی کرانے کا فیصلہ کیا گیا ہے۔ واقعہ کا مقدمہ سی ٹی ڈی یا مقامی تھانے میں درج کرایا جائے گا۔ دوسری جانب ابتدائی تحقیقاتی رپورٹ میں عمران خان پر ہونے والے حملے کے وقت 2 مختلف اسلحوں سے فائرنگ کیے جانے کی تصدیق ہو گئی ، سیکورٹی اداروں نے وزیر آباد میں عمران خان پر ہونے والے قاتلانہ حملے کی ابتدائی تحقیقاتی رپورٹ مکمل کر لی۔ابتدائی تحقیقات کے دوران انکشاف ہوا کہ کنٹینر پر پستول کے علاوہ بڑے اسلحے سے بھی فائرنگ کی گئی۔ ابتدائی تحقیقاتی رپورٹ کے مطابق جائے وقوعہ سے 11 گولیوں کے خول ملے ہیں ،9 خول پستول کی گولیوں اور 2 بڑے اسلحے کی گولی کے خول ہیں۔ پولیس کے مطابق پستول کی گولیاں نیچے سے اوپر کنٹینر کی طرف چلائی گئیں جبکہ بڑے اسلحے والی گولیاں کنٹینر سے نیچے کی طرف چلائی گئیں۔واضح رہے گزشتہ روز تحریک انصاف کے لانگ مارچ کے دوران سابق وزیراعظم عمران خان کے کنٹینر پر وزیرآباد میں فائرنگ کا واقعہ پیش آیا،اللہ والا چوک میں پی ٹی ائی استقبالیہ کیمپ کے قریب فائرنگ ہوئی،عمران خان گولی لگنے سے زخمی ہوئے اور وہ اب بہتر حالت میں ہیں۔گولی لگنے سے عمران خان کی ٹانگ میں زخم آیا،عمران خان شوکت خانم ہسپتال میں زیر علاج ہیں،فیصل جاوید بھی زخمی ہوئے،عمران خان ٹانگ پر گولی لگنے سے زخمی ہوئے،زیادہ تر لوگ جسم کے نچلے حصے میں گولیاں لگنے سے زخمی ہوئے۔ پولیس ذرائع کا کہنا ہے کہ حملہ آور نے ایک برسٹ چلایا اور بعد میں ایک اور گولی چلائی۔