جنیوا(نیوز ڈیسک)اقوامِ متحدہ کی انسانی حقوق کونسل کے 59 ویں اجلاس میں پاکستان نے ایک بار پھر سفارتی سطح پر بھارت کو مؤثر اور دوٹوک جواب دے کر عالمی توجہ حاصل کر لی۔ پاکستانی سفارتکار دانیال حسنین نے اپنے دبنگ خطاب میں بھارت کے دوہرے چہرے اور انسانی حقوق کی سنگین خلاف ورزیوں کو بے نقاب کیا۔

سفارتکار دانیال حسنین نے واضح الفاظ میں کہا کہ بھارت جنوبی ایشیا میں ایک بدمعاش اور انتہاپسند ریاست بن چکا ہے، جو خطے کے امن اور استحکام کے لیے ایک مستقل خطرہ ہے۔ انہوں نے کہا کہ بھارت نہ صرف انسانی حقوق کی مسلسل کھلم کھلا خلاف ورزیاں کر رہا ہے بلکہ سرحدی جارحیت، پانی بند کرنے کی دھمکیاں، اور دہشتگردوں کی پشت پناہی جیسے اقدامات سے خطے کو ایٹمی جنگ کی دہلیز تک لے جا رہا ہے۔

دانیال حسنین نے اپنے خطاب میں کہا کہ بھارت کی سیاسی قیادت خود کھلے عام پاکستان میں دہشتگرد کارروائیوں کی ذمہ داری قبول کرتی ہے، جو اس کے ریاستی دہشتگردی کے ایجنڈے کا ثبوت ہے۔ انہوں نے کہا کہ بھارت میں اختلاف رائے رکھنے والوں کو قتل کیا جا رہا ہے، سیاسی مخالفین کے گھر گرائے جا رہے ہیں اور اقلیتوں کے ساتھ امتیازی سلوک روز کا معمول بن چکا ہے۔

انہوں نے مقبوضہ جموں و کشمیر کا ذکر کرتے ہوئے کہا کہ بھارت وہاں سازش کے تحت جغرافیائی تبدیلیاں کر کے بین الاقوامی قوانین کی سنگین خلاف ورزی کر رہا ہے، جس پر عالمی برادری کی خاموشی افسوسناک ہے۔

دانیال حسنین نے کہا کہ چاہے انڈین اسپانسرڈ دہشتگردی ہو یا سرحدی جارحیت، پاکستان نے ہمیشہ پوری جرات اور استقامت سے بھارت کا مقابلہ کیا ہے۔ “پاکستان اپنی خود مختاری کا تحفظ کرنا اچھی طرح جانتا ہے”، انہوں نے اپنے خطاب کا اختتام ان الفاظ پر کیا۔

اس خطاب نے نہ صرف عالمی برادری کو بھارت کے اصل چہرے سے آگاہ کیا بلکہ ایک بار پھر سفارتی محاذ پر پاکستان کی پوزیشن کو مؤثر انداز میں اجاگر کیا۔