راولپنڈی میں ٹریفک قوانین کی خلاف ورزیوں کے خلاف جدید اور خودکار کارروائی کا آغاز ہوگیا ہے۔ سیف سٹی منصوبے کے مکمل فعال ہونے کے بعد شہر میں آج سے ای چالان سسٹم باضابطہ طور پر شروع کر دیا گیا۔
چیف ٹریفک آفیسر راولپنڈی فرحان اسلم کے مطابق پورے شہر میں 359 مقامات پر 2 ہزار سے زائد کیمرے نصب کیے گئے ہیں جو مسلسل ٹریفک کی نگرانی کر رہے ہیں۔ ان کیمروں کے ذریعے موٹر سائیکل اور گاڑیوں کی نقل و حرکت پر نظر رکھی جائے گی، جبکہ ٹریفک قوانین کی خلاف ورزی پر خودکار ای چالان جاری ہوگا۔
سی ٹی او نے بتایا کہ ہیلمٹ نہ پہننے، سیٹ بیلٹ کی پابندی نہ کرنے، سگنل توڑنے سمیت دیگر خلاف ورزیوں پر کیمرے فوری طور پر ریکارڈ تیار کریں گے اور ای چالان تصویر اور کوڈ کے ساتھ گاڑی کے مالک کے گھر کے پتے پر بھیجا جائے گا۔
فرحان اسلم نے کہا کہ سیف سٹی کیمروں کے فعال ہونے سے ٹریفک مینجمنٹ میں نمایاں بہتری آئے گی، اور ٹریفک وارڈنز اب چالان کرنے کے بجائے ٹریفک کی روانی برقرار رکھنے پر زیادہ توجہ دے سکیں گے۔
راولپنڈی میں ای چالان سسٹم کا آغاز شہریوں کے لیے جدید اور شفاف ٹریفک نظام کی طرف اہم قدم تصور کیا جا رہا ہے۔