ٹیکنالوجی کمپنی گوگل نے اسمارٹ فونز میں بڑھتی ہوئی ریم کی ضروریات اور ایپس کی جانب سے زیادہ میموری استعمال کیے جانے کے مسئلے سے نمٹنے کے لیے گوگل پلے پر ایپس اور گیمز کے لیے نئے کارکردگی کے معیار متعارف کرانے کا اعلان کر دیا ہے۔

اینڈرائیڈ ڈویلپرز بلاگ پر جاری بیان کے مطابق گوگل کا مقصد ایپس کے میموری استعمال کو کم کرنا، ڈیٹا ٹرانسفر کو زیادہ مؤثر بنانا اور ڈیوائس کی مجموعی کارکردگی کو بہتر بنانا ہے۔ نئے اقدامات کے تحت ڈویلپرز کو اپنی ایپس کو اس طرح بہتر بنانا ہوگا کہ وہ غیر ضروری طور پر زیادہ ریم استعمال نہ کریں۔

گوگل پلے پر اینڈرائیڈ ایپس اور گیمز کے لیے مخصوص پرفارمنس تھریش ہولڈز مقرر کیے جائیں گے۔ ایسی ایپس جو ضرورت سے زیادہ میموری استعمال کرکے فون کی رفتار متاثر کرتی ہیں، انہیں نئے معیار پر پورا اترنے کے لیے اپنی کارکردگی بہتر بنانا ہوگی۔

نئے معیار میں ڈائنامک میموری منیجمنٹ (بشمول انانیمس آر ایس ایس اور سویپ)، بِٹ میپ ڈیٹا یوٹیلائیزیشن اور ڈیکس کوڈ آپٹیمائیزیشن جیسے شعبے شامل ہیں۔

گوگل کے مطابق ان اقدامات کا مقصد میموری کی کمی کے باعث فون کے سست ہونے اور ایپس کے خودکار طور پر بند ہونے کے واقعات کو کم کرنا ہے۔

گوگل نے نئی ڈیوائسز کے لیے زیرو-ٹیپ سائن-اِن کے عمل کو بھی بہتر بنانے کا اعلان کیا ہے، جس کے ذریعے صارفین کے لیے سائن اِن کا تجربہ مزید آسان اور محفوظ بنانے کی کوشش کی جائے گی۔

مزید پڑھیں:پنجاب، اسموگ سے قبل ریسٹورنٹس و میرج ہالز کیخلاف کریک ڈاؤن، 554 کمرشل کچن سیل

کمپنی کا کہنا ہے کہ ان تبدیلیوں سے نہ صرف ایپس زیادہ مؤثر انداز میں کام کریں گی بلکہ کم ریم والے اینڈرائیڈ فونز پر بھی صارفین کو نسبتاً بہتر اور ہموار تجربہ مل سکے گا۔