وفاقی حکومت کی ہدایات پر ائل اینڈ گیس ریگولیٹری اتھارٹی (اوگرا) نے پیٹرولیم مصنوعات کی قیمتوں میںمسلسل دوسرے روز بھی اضافے کا باضابطہ اعلان کر دیا ہے۔

اسلام آباد: وزارتِ توانائی (پیٹرولیم ڈویژن) کی جانب سے 10 ستمبر 2026 کو جاری کردہ تازہ ترین پریس ریلیز کے مطابق، وفاقی حکومت کی نظر ثانی شدہ پیٹرولیم پرائسنگ میکانزم کے تحت اوگرا نے 11 ستمبر 2026 کیلئے پیٹرولیم مصنوعات کی ایکس ڈیپو قیمتوں میں دوبارہ ترمیم کر دی ہے۔

سرکاری اعداد و شمار کے مطابق، مسلسل دوسرے روز ہونے والے اس اضافے کے تحت ہائی اسپیڈ ڈیزل (HSD) کی قیمت میں مزید 5.37 روپے فی لیٹر کا اضافہ کیا گیا ہے، جس سے اس کی قیمت 392.67 روپے سے بڑھ کر 398.04 روپے فی لیٹر ہو گئی ہے۔

اسی طرح موٹر اسپرٹ (پیٹرول) کی فی لیٹر قیمت میں مزید 3.05 روپے کا اضافہ ریکارڈ کیا گیا ہے، جس کے بعد پیٹرول کی نئی قیمت 367.75 روپے سے بڑھ کر 370.80 روپے فی لیٹر کی سطح پر پہنچ گئی ہے۔ اوگرا کے مطابق ان نئی قیمتوں کا اطلاق 11 ستمبر 2026 کیلئے ملک بھر میں ہو گا۔

 

یاد رہے کہ حکومت کی جانب سے ملک میں روزانہ کی بنیاد پر پیٹرولیم قیمتوں کا تعین عوام پر بھاری بھرکم بوجھ بن گیا ہے۔یکم سے 10 ستمبر تک صرف 10 روز میں پیٹرولیم مصنوعات کی قیمتوں میں 25 روپے فی لیٹر تک اضافہ ریکارڈ کیا گیا ہے۔دستاویزات کے مطابق 10 روز میں پیٹرول فی لیٹر 24 روپے 96 پیسے مہنگا کیا گیا جبکہ ڈیزل کی فی لیٹر قیمت میں 22 روپے 26 پیسے کا اضافہ ہوا۔ اس دوران ڈیزل کی قیمت مسلسل بڑھتی رہی جبکہ پیٹرول صرف ایک روز کے لیے سستا ہوا۔

دستاویزات کے مطابق یکم ستمبر کو پیٹرول کی فی لیٹر قیمت 342 روپے 79 پیسے تھی، جو 10 ستمبر کو بڑھ کر 367 روپے 75 پیسے ہو گئی۔ اس طرح صرف 10 روز کے دوران پیٹرول کی قیمت میں مجموعی طور پر 24 روپے 96 پیسے اضافہ ریکارڈ کیا گیا۔

2 ستمبر کو پیٹرول 1 روپے 8 پیسے مہنگا کیا گیا۔ 3 ستمبر کو 2 روپے 29 پیسے اور 4 ستمبر کو 2 روپے 84 پیسے اضافہ کیا گیا۔

5 سے 7 ستمبر کے لیے پیٹرول 3 روپے 13 پیسے سستا کیا گیا، تاہم اس کے بعد دوبارہ اضافے کا سلسلہ شروع ہوگیا اور 8 ستمبر کے لیے پیٹرول 12 روپے 90 پیسے مہنگا ہوا جبکہ 9 ستمبر کے لیے 5 روپے 58 پیسے اضافہ کیا گیا۔

دستاویزات کے مطابق 10 ستمبر کے لیے پیٹرول مزید 3 روپے 40 پیسے مہنگا کیا گیا، جس کے بعد اس کی قیمت 367 روپے 75 پیسے فی لیٹر کی سطح پر پہنچ گئی۔

دستاویزات کے مطابق یکم ستمبر کو ڈیزل کی فی لیٹر قیمت 370 روپے 41 پیسے مقرر تھی، جو 10 ستمبر کو بڑھ کر 392 روپے 67 پیسے کی سطح پر پہنچ چکی تھی۔

2 ستمبر کو ڈیزل 51 پیسے مہنگا کیا گیا، 3 ستمبر کو 1 روپے 11 پیسے اور 4 ستمبر کو 2 روپے 28 پیسے اضافہ کیا گیا۔ پھر 5 سے 7 ستمبر کے لیے ڈیزل 3 روپے 72 پیسے مہنگا کیا گیا۔

دستاویزات کے مطابق 8 ستمبر کے لیے ڈیزل 3 روپے 72 پیسے مزید مہنگا ہوا جبکہ 9 ستمبر کے لیے اس کی قیمت میں 4 روپے 18 پیسے اضافہ کیا گیا اور 10 ستمبر کے لیے ڈیزل 6 روپے 72 پیسے مزید مہنگا کیا گیا۔

اس مسلسل اضافے کے بعد ڈیزل کی قیمت 392 روپے 67 پیسے فی لیٹر تک پہنچ گئی ہے، جبکہ 10 روز کے دوران مجموعی اضافہ 22 روپے 26 پیسے ریکارڈ کیا گیا۔