پاکپتن میں دیپالپور روڈ پر مسافر بس اور ٹرالر کے درمیان خوفناک تصادم کے نتیجے میں 11 افراد جاں بحق اور متعدد شدید زخمی ہوگئے۔

ریسکیو حکام کے مطابق مسافر بس ملتان سے لاہور جا رہی تھی کہ دیپالپور روڈ پر 17 ایس پی کے قریب آلوؤں سے لدے ٹرالر سے ٹکرا گئی۔ تصادم کے بعد بس الٹ گئی، جس کے نتیجے میں متعدد مسافر اس میں پھنس گئے۔

حادثے کی اطلاع ملتے ہی ریسکیو ٹیمیں موقع پر پہنچ گئیں اور بس میں پھنسے زخمیوں اور جاں بحق افراد کی لاشوں کو نکالنے کے لیے امدادی کارروائیاں شروع کردیں۔

واقعے کی اطلاع پر ڈپٹی کمشنر آصف رضا اور ڈسٹرکٹ پولیس آفیسر (ڈی پی او) جاوید اقبال بھی جائے حادثہ پر پہنچ گئے۔

ضلعی انتظامیہ کے مطابق حادثے میں زخمی ہونے والے افراد کو فوری طبی امداد فراہم کرنے کے لیے ڈسٹرکٹ اسپتال میں ایمرجنسی نافذ کردی گئی ہے۔