راولپنڈی: صدر آصف علی زرداری نے نیول ہیڈکوارٹرز کا دورہ کیا، جہاں نیول چیف ایڈمرل نوید اشرف نے ان کا پرتپاک استقبال کیا۔ صدر مملکت کو پاک بحریہ کے چاک و چوبند دستے نے گارڈ آف آنر پیش کیا۔ اس موقع پر صدر زرداری نے یادگار شہدا پر پھولوں کی چادر چڑھائی اور شہدا کو خراج عقیدت پیش کیا۔دورے کے دوران نیول چیف نے صدر مملکت کو میری ٹائم سکیورٹی کی موجودہ صورتحال، پاک بحریہ کی آپریشنل تیاریوں اورمعرکہ حق میں حاصل کی گئی کامیابیوں پر تفصیلی بریفنگ دی۔ صدر مملکت نے معرکہ حق کے دوران پاک بحریہ کے بروقت اور مؤثر ردعمل، پیشہ ورانہ صلاحیتوں اور غیر متزلزل عزم کو سراہتے ہوئے بھارتی جارحیت کے خلاف کامیاب دفاع پر نیوی کو مبارکباد دی۔ایڈمرل نوید اشرف نے صدر کے دورے پر ان کا شکریہ ادا کرتے ہوئے اس عزم کا اعادہ کیا کہ پاک بحریہ ملکی سمندری سرحدوں اور بحری مفادات کے دفاع کے لیے ہر دم تیار ہے۔