اسلام آباد (نیوز ڈیسک) صدر مملکت آصف علی زرداری کا کیپٹن کرنل شیر خان شہید (نشانِ حیدر) کو خراجِ عقیدت
صدر مملکت آصف علی زرداری نے قوم کے عظیم ہیرو کیپٹن کرنل شیر خان شہید (نشانِ حیدر) کو ان کی بے مثال جرأت، قربانی اور بہادری پر زبردست خراج عقیدت پیش کیا ہے۔ صدر نے کہا کہ شہید کیپٹن کرنل شیر خان نے مادرِ وطن کے دفاع کے لیے اپنی جان کا نذرانہ دے کر سچے سپاہی ہونے کا ثبوت دیا۔
صدر زرداری نے اپنے پیغام میں کہا کہ کیپٹن کرنل شیر خان شہید کی قربانی ہماری قومی تاریخ کا ایک روشن اور سنہری باب ہے، جو ہمیشہ فخر سے یاد رکھا جائے گا۔ انہوں نے کہا کہ شہداء کی قربانیاں ہماری آزادی، خودمختاری اور سلامتی کی بنیادی ضمانت ہیں۔
صدر مملکت نے اس بات پر زور دیا کہ پوری قوم شہید کی قربانی، بہادری اور فرض شناسی کو سلام پیش کرتی ہے اور یہ جذبہ آئندہ نسلوں کے لیے مشعلِ راہ رہے گا۔ کیپٹن کرنل شیر خان شہید کی عظمت اور شجاعت کو ہمیشہ قومی تاریخ میں ممتاز مقام حاصل رہے گا۔
صدر آصف علی زرداری نے کہا کہ آج کا دن ہمیں یاد دلاتا ہے کہ ہماری مسلح افواج مادرِ وطن کے تحفظ کے لیے ہر دم تیار ہیں اور قوم کو اپنے شہداء پر فخر ہے۔
