صدرِ مملکت آصف علی زرداری نے خواتین پر تشدد کے خاتمے کے بین الاقوامی دن کے موقع پر اپنے پیغام میں کہا کہ ہر عورت کو خوف و تشدد سے پاک زندگی گزارنے کا حق حاصل ہے۔ انہوں نے واضح کیا کہ خواتین پر تشدد انسانی حقوق کی سنگین خلاف ورزی ہے اور پاکستان عالمی برادری کی طرح دنیا بھر کی خواتین اور لڑکیوں کے ساتھ مکمل یکجہتی کا اظہار کرتا ہے۔
صدر زرداری نے زور دیا کہ خواتین کو تعلیم، ہنرمندی اور معاشی خودمختاری کے ذریعے بااختیار بنانا نہایت ضروری ہے۔ ساتھ ہی مضبوط قانونی فریم ورک کے ساتھ معاشرتی اور ثقافتی رویوں میں تبدیلی بھی وقت کا اہم تقاضا ہے۔
اس برس کے موضوع، ’’تمام خواتین و لڑکیوں کے خلاف ڈیجیٹل تشدد کے خاتمے کے لیے متحد ہوں‘‘، پر بات کرتے ہوئے صدر نے کہا کہ ڈیجیٹل دنیا میں بڑھتے ہوئے تشدد کے واقعات فوری توجہ کے متقاضی ہیں۔
انہوں نے بتایا کہ حکومتِ پاکستان نے خواتین کے تحفظ کے لیے اہم قوانین نافذ کیے ہیں، اور کم عمری کی شادی کے خاتمے کے حوالے سے سندھ، اسلام آباد اور پنجاب میں نمایاں پیش رفت ہوئی ہے۔ صدر نے صوبوں پر زور دیا کہ وہ بھی موثر قانون سازی کریں اور موجودہ قوانین پر سختی سے عمل کو یقینی بنائیں۔
صدر آصف علی زرداری نے متاثرہ خواتین، سماجی کارکنوں اور اداروں کی خدمات کو قابلِ تحسین قرار دیا اور خواتین کے حقوق کے تحفظ اور صنفی تشدد کے خلاف قومی یکجہتی کے عزم کا اعادہ کیا۔