سال 2024 میں برطانیہ میں سیاسی پناہ کے لیے پاکستانی شہریوں کی درخواستیں سب سے زیادہ ریکارڈ کی گئیں۔ برطانوی اخبار دی ٹیلی گراف کی رپورٹ کے مطابق، اس سال مجموعی طور پر 40 ہزار اسائلم درخواستیں جمع ہوئیں، جن میں سے 11 ہزار سے زائد پاکستانی شہریوں کی طرف سے دی گئیں۔
یہ تعداد 2022 کے مقابلے میں تقریباً پانچ گنا زیادہ ہے، اور پاکستان دنیا کے 175 ممالک میں سب سے زیادہ اسائلم درخواستیں دینے والا ملک بن گیا ہے۔ دلچسپ بات یہ ہے کہ تمام پاکستانی درخواست دہندگان ابتدا میں وزٹ، ورک یا اسٹوڈنٹ ویزے کے ذریعے قانونی طور پر برطانیہ میں داخل ہوئے، اور بعد میں انہوں نے اسائلم کے لیے درخواستیں جمع کرائیں۔
برطانیہ کے شیڈو ہوم سیکرٹری کرس فلپ نے اس صورتحال کو ویزا سسٹم کی “مکمل ناکامی” قرار دیتے ہوئے کہا کہ ویزا اور بارڈر سسٹم کے غلط استعمال کو روکنے کے لیے فوری اور سخت اقدامات کی ضرورت ہے۔